ورقہ 455

8506
جے ماں بابل راضی ہوون عذر نہیں کجھ میرا
سر اکھیں پر منیا بھینے جو فرمانا تیرا
8507
ایہناں گلاں وچ آہیاں دوئے ماں ملکہ دی آئی
اگوں اُٹھ بدیع جمالے عزت نال بہائی
8508
گلوں گل ہلا شتابی مائی نوں فرمائیوس
حال احوال بدیس ونجن دا درداں نال سنائیوس
8509
اے مائی کر ہمت تساں سفر میرے سر پایا
چلی میں پردیس اکلی واہ آدم سنگ آیا
8510
محرم دل دا اک شزادہ اوہ ونج تخت بہے گا
کس سنگ میں گل کتھ کریساں چِت اُداس رہیگا
8511
سنگ میرا سی بدرہ خاتوں نال اوہدے دل رلیا
بھیت اندر دے ونڈن والا نال نہیں کوئی چلیا
8512
توڑے شہر مصر وچ ہوسن کُڑیاں بھلیاں بھلیاں
میں پری اوہ آدم جایاں کد طبیعتاں رلیاں
8513
جمدڑیاں دی محرم آہی بدرہ خوب سہیلی
باجھ سہیلی کیکر کٹساں اس پردیس اکیلی
8514
اک صلاح میرے دل آئی جے توں منے مائی
ردّ نہ کریں سوال بندی دا تاں آکھاں گل کائی
8515
نالے خوف تساں تھیں لگدا مت دلگیر نہ ہوویں
شفقت والا حرف دلے توں چلدی وار نہ دھوویں
8516
میں محتاج تساڈی ہوئیوس مہر کرو ترجاواں
نہ منوں تاں بول دھگانے کاہنوں بھرم گُماواں
8517
مائی نے فرمایا دھیےّ کے ایسی گل بھاری
مُڑ مڑ پکے قول کراویں ہووے ہوون ہاری
8518
مشکل گل اجیہی کیہڑی جیہڑی توں فرماسیں
میں اگوں من سکساں ناہیں نو میدی کر جاسیں
8519
جیہناں دناں وچ سخن تساڈے مینوں منوں نہ بھاون
شالہ ایسے روز کولےّ ساڈے ول نہ آون
8520
بیشک دس تیرے دل جیہڑی ہوو نہار نہ موڑاں
توں دھیاں تھیں پیاری مینوں آس تیری کیوں تروڑاں
8521
شاہ پری نے کہیا مائے بدرہ دے اسانوں
صاعد نال ویاہیے اس نوں ایہ گل کہاں تسانوں
8522
مائی نے فرمایا دھیےّ کہی آ بات اپُٹھّی
کے کراں نہیں موڑن ہوندی حرص تیری میں کُٹھیّ
8523
اساں تیرے تھیں فرق نہ کوئی نہ کجھ عذر بہانہ
باپ کڑی دے کولوں پچھ لے ڈاڈھا طور شہانہ
8524
اُٹھ بدرہ دی مائی اوتھوں خاوند دے ول آئی
مطلب دی گل پچھن لگی ورتی کھول سنائی

لفظالی:
بدیس= پرائے دیس، سنگ= نال ، آہیاں = سن ، گل کتھ= بات چیت ،چِت= دل، سنگ= ہم نشیں سہیلی، توڑے= بھانویں ، کٹساں = زندگی بھوگاں گی، ہویوس = میں ہوئی ہاں ، ترجاواں= پار لنگھاں ، بھرم گُماواں= چنگے تعلقات دا بھانڈا نہ بھن لاں ، ہویوس = میں ہوئی ہاں ، ہووے ہوون ہاری= جیہڑی کرنی او کر ای لے ، نومیدی کر جاسیں = ناامید ہو کے جاویں گی، روز کولےّ= بھیڑے پُٹھے دن، ہوون ہار= ممکن ۔ ہون دے قابل، حرص تیری میں کُٹھی= تیری محبت تے مینوں کوہ چھڈیا اے، ورتی= بیتی، دھگانے= خواہ مخواہ، دلگیر ہوونا= غم افسوس نال دل پھڑ بہنا، بندی=باندی۔ خادمہ ( اپنے آپ نوں عاجزی پاروں )، واہ آدم سنگ آیا= آدمی دے وس پے گئی ہاں ،