ورقہ 456

8525
سراندیپ شہر دے شاہے سمجھی گل تمامی
ایس صلاح اُتے سبھ راضی کیا خاصی کیا عامی
8526
نالے صاعد اگے اس نوں بہت پسندی آیا
سرو بانو نے آہا نالے ایہو ساک بنایا
8527
بی بی نوں فرمایا شاہے توں جانے کم تیرا
کیتی تیری بھنساں ناہیں سخن ایہو سن میرا
8528
نیک صلاح اساڈے بھانے جے رب سچے بھاوے
کیا نیڑے کیا دور دھیاں نوں مولیٰ سُکھ وساوے
8529
در گھر ویکھ لئے ہن سبھے نقص نہیں کجھ موُلے
صاعد جیہا مَنُکھ اسانوں ہور لبھے کِت رُولے
8530
نالے شارستانی سارے کردے منت داری
گوہڑا مِٹھا بھائی چارہ بانہہ اساڈی بھاری
8531
مائی بابل گلاں کر دے بدرہ چھُپ سُنیندی
مائی نالوں اوّل آکے خبر پری نوں دیندی
8532
باپ میرے نے گل تمامی ماں میری پر سٹی
اس نوں تساں نہ ہلّن دینا مت کوئی مارے پَٹی
8533
شاہ پری سُن راضی ہوئی رب دتا سُکھ لینا
شہر مصر وچ کٹھیاں وسساں اسیں دوئے دُدّھ بھیناں
8534
صاعد ول پری کہہ گھلیا اے بھائی مردانہ
جے بدرہ لے دیئیے تینوں دیسیں کے نذرانہ
8535
صاعد کہیا میں ہاں بندہ چاکر تیرے در دا
سر دتا کے چنگا سر تھیں سدا رہاں گا بردہ
8536
شاہ پری پھر اُٹھ شتابی آپوں اندر آئی
اگے گلاں کر دے آہے بدرہ دے پیؤ مائی
8537
اُتوں شاہ پری ونج نکلی چاء سوال سنایا
دوہاں ہتھ سرے پر پھیرے ناتا جھولی پایا
8538
شاہ پری خوش راضی ہوئی سبھناں دے دل شادی
مائی شاہ پری نوں دتی شگن مبارک بادی
8539
سروبانو نوں آن شتابی کہیا بدیع جمالے
اوس مبارک ونج پُچائی عاصم تے شاہپالے
8540
عاصم تے شاہپالے خوشئیں مجلس کیتی تازی
شاہ وزیر سبھو رل بیٹھے شادی بے اندازی
8541
سر اندیپ نگر دے شاہ نوں شاہپالے فرمایا
بدرہ خاتوں دا حق میں پر بیٹی اوس کہایا
8542
دھیاّں دا سِر بھار نہ چنگا کاج ایہدا میں کرساں
داج اتے دستور تمامی دے دیساں جو سرساں
8543
سر اندیپ شہر دے شاہے کیتے جتن بتیرے
کاج کراں میں آپ دھیؤدا تسیں ڈُھکو گھر میرے

لفظالی:
بی بی = بیوی، بھنساں = توڑاں ۔ منسوخ کراں ، ساڈے بھانے= ساڈے خیال وچ، مُنکھ = شخص۔ انسان ، کِت رولے= کس طریقے نال ، کر دے منت داری= ساڈے احسان مند نیں ، بانّہہ = ویلے سر کم آون والا مدد گار بھائی ، پٹی مارے= غلط سبق پڑھادیوے، مردانہ = ہیرو دے گن رکھن والا، بردہ= زرخرید غلام، جھولی پایا= رضا مندی نال سپرد کیتا، میں پر = میرے اُتے ، بھار = فرض جیہڑا قرض توں وی ڈاہڈا ہووے، کاج = شادی دیاںرسماں دا سارا فنکشن، جو سرساں = جومیری توفیق ہووے گی، ڈُھکو = میرے گھر جنج لیاؤ،