ورقہ 458

8563
جس دن چاہیں پاس تساں دے اسیں ہوواں گے حاضر
دیواں اگے پندھ نہ کوئی بندیاں مشکل آخر
8564
سیف ملوکے دے دل اگے ایہو خواہش آہی
جھکدا عرض نہ کردا آہا مت جانن کوتاہی
8565
جاں ہن آپ کہیا شاہپالے کھُلاّ اس دا راہا
چُمّ زمین لگا فرماون سن توںحضرت شاہا
8566
دم دم نال اقبال نصیباں دائم شان سوایا
سر میرے پر لطف تیرے دا رہے ہمیشہ سایہ
8567
میں گولا توں صاحب میرا حکموں سیس نہ موڑاں
جو صاحب دے امروں بھجے لیندا سخت مروڑاں
8568
جو فرماؤ سر پر مناں کیا مقدور بندے دا
ہر دم والی نوں خصما نہ نیڑے دُور بندے دا
8569
اس ویلے شاہپال بہادر دیندا حکم وزیراں
ستر ہزار عفریت بہادر جو جانن تدبیراں
8570
سیف ملوکے سنگ لوائے ڈیرا چاون تائیں
داج جہیز کروڑاں دتے کے کُجھ آکھ سنائیں
8571
تحفے ہدے تے نذرانے زیور حد نہ کائی
لکھ پکوان اتے سوغاتاں میوے تے مِٹھیائی
8572
جوڑے جامے گھوڑے ہاتھی اشتر اُٹھ قطاراں
تازی ترکی نر عراقی کوتل پھڑے ہزاراں
8573
نُقرے ککے کُلےّ چینے ' مُشکی بوزے نیلے
پنج کلیان اتے شاہ گنڈھی ابلق رنگ رنگیلے
8574
چُور کمیت اتے کجھ سُرنگے سوسن تے رنگ ساوے
گل وِچ ہنس حمیلاں لُوہلاںزیورانت نہ آوے
8575
چاندی دے گھڑ لعل بنائے سونے دے سبھ ہنّے
ہر اک اُپر زین مرصّع لعل جواہر پنےّ
8576
شارستان اندر جو آہیاں سوہنی صورت پریاں
خدمتگاراں کر کے دتیاں زیور گہنے بھریاں
8577
دیو زور اور تے جِنّ سوہنے دتے کر کے گولے
ہور گویاّ ایسا ایسا وہن ڈکے جد بولے
8578
دولت مال حسابوں باہر راج ادّھا ونڈ دِتاّ
توشے خانے سے خزانے دھن دتا دھن لِتاّ
8579
پوستیناں پشمینے روئیں رنگ عجائب جامے
چاندی سونے دے سے بھانڈے جیوں جگ دیئے ترامے
8580
پنکھی خوب آوازاں والے جُرّے باز شکاری
ہور کئی ہتھیار جیہناں دی قیمت پوندی بھاری
8581
مُشکاں تے خوشبوئیں گھنیاں کئی عجائب چیزاں
گنتر مشکل کار محمد جے لکھ کریں تمیزاں

لفظالی:
کوتاہی = غلطی۔ کم وچ سستی ،چُم زمین= تخت دے سامنے والی زمین نوں چمن ای ادب گنیا جانداسی تخت نوں یابندے نوں چُمن دی جرت کہنو ں سی، لطف= مہربانی ۔کرم ، گولا= غلام ، صاحب= مالک ، مروڑاں = عذاب ۔ سزا، امروں بھجنا= حکم عدولی کرنا، سر پر = لازمی طورتے ، مقدور= حیثیت ۔ کم کر سکن دی قدرت، خصمانہ= خصماں مالکاں والی ذمہ داری ، عفریت = جن بھوت ۔ ڈراؤنی بلا، اُشتر= شُتر دا دوجا تلفظ، کوتل= نمائشی گھوڑے جہدے تے سوار کوئی نہیں ہوندا لگام پھڑکے پیدل نال نال ٹر دے نیں ، ہنس = ہس ، لوہلاں = گل دا گہنا، حمیل = گل وچ لمکن والا گہنا، مرصع = جڑ ے ہوئے ، نعل = کھُریاں ، ہنا= گھوڑے دی کاٹھی دا موہرلا اُچا حصہ، ویہن = وگدا پانی۔ دریا ۔ ندی نالے، روئیں رنگ = پِتل رنگے ، گنتر = شمار گنتی، جیوں جگ دئے ترامے= جتھے عام لوک تانبے دے بھانڈے دیندے نیں ، تمیزاں = پچھاناں ، دھن دتا=(١) دولت خرچ کیتی (٢) دھی دتی، دھن لتا= خلقت کولوں دھن دھن اکھوایا شابش تے سوبھا کھٹی (٢) پُتر لیا،نقرے مُشکی بوزے=ٹ ک گھوڑیاں دے رنگ،