ورقہ 459

8582
دس ہزار پری جو خاصی نالے چار ہزاراں
لایاں نال بدیع جمالے کر کے خدمتگاراں
8583
کئی کوہاں وچ تخت بنایا اس پر بیٹھے ڈیرے
حجرے ستر سرائیں بنیاں ہور مکان بتیرے
8584
شہر مصر ول ہوئے روانہ کوچ بُلایا شاہاں
سروبانو شاہپال چلے سن رخصت کرن اگاہاں
8585
پریاں دیو عفریت زور اور راسک جن بتیرے
شاہزادے نوں سوہرے دتے لشکر گھنے گھنیرے
8586
پریاں دیواں تے عفریتاں شاہ کرے تاکیداں
شاہزادے دے حکمے اندر رہنا وانگ مریداں
8587
عاصم شاہ تے سیف ملوکے صاعد صالح تائیں
وکھو وکھ وِداع کیتو نیں رُنے گھت کہائیں
8588
یار اشنا محبتی خاصے آہو خاطف ہوریں
ہنجوں روندے صدقے ہوندے گھر نوں موڑے زوریں
8589
ڈولی پاء بدیع جمالے آء گل لگی مائی
رتو روندی ڈھہ ڈھہ پوندی دھیےّ پئی جدائی
8590
سیاّں سنگ اوتھے جو رہیاں سبھ کوکاں دے رُنیاں
رباّ ہائے بدیع جمالوں رہساں کویں وچھنیاں
8591
شاہ پری دے سرتے آون پریاں بنھ قطاراں
کونجاں ہار مریہن کوکاں بھّجا چَین اُڈاراں
8592
پیا فراق ہزاراں تائیں کوچ کیتا گلزاراں
باغ ارم پُر خزاں محمد ٹریاں لدبہاراں
8593
رُتّ بسنت ٹُری پھُل چُن کے دیکے خارگلاباں
مالی دے دل خارغماں دے وانگر جگر کباباں
8594
بُلبل بھور پریشاں بیٹھے خستہ حال خراباں
سُکے ڈھینگر ویکھ محمد پکڑی جان عذاباں
8595
مائی نوں غش آئی غم تھیں پھُرنے پیا مروڑا
محلاں وچ ہنیرا دسدا باغاں اندر روڑا
8596
جاں فرزند پیارے وچھڑن کون رووے مڑ تھوڑا
سب روگاں سر روگ محمد جس دا نام وچھوڑا
8597
بابل ہتھ سرے پر پھیرے کریں تحمّل بیٹی
قسمت قلم حضوروں وَگی کس تھیں جاندی میٹی
8598
جاں جاں ہوگ حیاتی ساڈی فکر نہیں کجھ تیں نوں
گھڑی گھڑی دی خبر لواں گے گھلساں کہسیں جیں نوں
8599
سر اندیپ شہر دے والی بدرہ ڈولی پائی
ہتھ گھماوے صدقے جاوے اودھر اس دی مائی
8600
بدرہ سی خود پیٹوں کڈھی مِٹھی بے شماری
شاہ پری دھی دُدّھ دی آہی اس تھیں بہت پیاری

لفظالی:
کوچ بلایا=روانہ ہون دا حکم دتا ،راسک=راکھش۔جنگلی شیطان جو دیوتیاں نال لڑ دے سن،کہائیں گھتنا=کہرام مچاونا۔ماتم وچ چیخ پکار تے وین کرنا،ڈھ ڈھ پوندی=ڈِگ ڈِگ پیندی،وچھنیاں=وچھڑیاں،اڈاراں=ڈاراںدا،ہزاراں=بلبلاں،پُرخزاں=خزاںنال بھریا،گھنے گھنیرے=چوکھے توں چوکھے،آہو خاطف=نام دے دا جنہے سیفل نوں چک کے لیاندا سی،ڈھینگر= پُھلاں والے بوٹے دیاںسُکیاں ٹہنیاںجیہڑیاں بالن دے کم آ سکن،پُھرنے =کلیجے۔جگر وچ،مروڑا=پیچ،روڑا =انتہادی خشک سالی سوکا، تحمل =غم غصہ جرن دی حالت ،سر=چوٹی داسب توں اُتلا حِصہ،حضوروں =خدائی درباروں ،میٹی=مٹائی،ہتھ گھماوے =بلائیں لوے،پیٹوں کڈھی=سکی دھی