ورقہ 461

8620
عاصم تے شاہپال بہادر رو ملے گل لگ کے
نالے سیف ملوک جوائی لیؤس کلاوے وگ کے
8621
مہر افروز تے سروبانو نے سیف ملوک بُلایا
دوہاں ول سلامی ہویا ادب بجا لیایا
8622
خلعت وکھو وکھ دتیو نیں لائق شان قدر دے
منہ چمّن ہتھ پھیرن سرتے نال پیار جگر دے
8623
نال بدیع جمال پری دے مِل مِل رجن ناہیں
چُمن منہ تے سینے لاون روون آہیں ڈھائیں
8624
الوداع ہوئی ہر پاسوں پرتے ٹور پیارے
چلے لد محمدبخشا جوبن دے بنجارے
8625
الوداع ٹروہن سجنو! چایاں رزق مہاراں
خاراں چھوڑ ہوئے پھُل راہی دیکے داغ ہزاراں
8626
الوادع ٹرے شب کٹ کے جیوں موتیں شبنم دا
دوزخ ہوگ گُلاں بِن بھوراں سُنجا باغ ارم دا
8627
موتیں چھوڑ مصر نوں چلے سِپّ پچھے کس کم دا
ملنا نال نصیب محمد نہیں بھروسا دم دا
8628
الوداع چلے لد ساتھی دے کے بھار غماں دے
بو چلی بلغاروں لوکارہ گئے چم چماں دے
8629
اُڈے دیو تخت نوں چائیں کر کے زور ضروری
سر اندیپ شہر وچ پہتے لتھے باغ حضوری
8630
ملک ولایت خبراں ہویاں آیا لوک سلامی
قدر بقدری نذراں تارن کیا خاصی کیا عامی
8631
شلکاں شور اُٹھایا وجے شادی دے شدیانے
خلق مبارک دیون آئی ہوندے خرچ خزانے
8632
بوہٹی ویکھن کڑیاں آون تک تک ہوش بھلاون
لاڑا ویکھ جوان ملک دے صدقے ہوہو جاون
8633
نویں نویں نت میلے لگدے لوک زیارت آوے
جو کوئی منگے سوئیو ملدا خلق مراداں پاوے
8634
پریاں دیو اسودے ہوئے مصری آدم زادے
سر اندیپی خدمت کر دے حدوں بہت زیادے
8635
کھاون کھانے چاول دانے پین شراب پرانی
کوئی دن سراندیپ شہر وچ ایسے طرحاں وہانی
8636
اوڑک چت اُداسی ہوئے عاصم تے شاہزادہ
حُبّ وطن دی غالب ہوئی گذرے روز زیادہ
8637
سراندیپ نگر دا والی سدّ اجازت لیندے
سکھ وسوّ تم دیساں والے اسیں بھلے ہُن ویندے
8638
کُڑیاں سنگ سہیلی سےاّں بھین بھرا پیارے
بدرہ خاتوں نوں مِل ٹورو ماں پیو سجن سارے

لفظالی:
سلامی ہویا =سلام پیش کیتا ،پرتے=واپس مڑے ،لیؤس کلاوے وگ کے =چھیتی نال جپھی پالؤ سو تیزی نال اوہنوں بغلگیر ہو گیا،نال پیار جگر دے=پورے جگری پیار نال ،چایاں رزق مہاراں =ایتھوں رزق مک گیا اے اگلے تھاں دے رزق نے سانوں روانہ ہوون تے مجبور کیتا اے،ہزاراں=بلبلاںنوں،پھُل=دونویںشادی شدہ جوڑے،خاراں=باقی سارے لواحقین ،سُنجا=بے آباد بے رونق، چائیں= چُکن، لوک=خلقت ۔ساراپنڈ،لتھے= ڈیرے آن لائے ۔نازل ہوئے ،تارن=ادا کرن پیش کرن، بوچلی بلغاروں =ٹ ک سہیل 122خوشبو دار چمڑے دی خوشبو نکل ٹُری اے ایہہ خوشبو تے سہیل ستارے دی برکت نال سی ہن نرا چمڑا ای رہ گیا جے،شلکاں=سلامی دین والیا ں توپاں ۔بندوقاں، بوہٹی=دلہن،اسودے=باآرام،وہانی=زندگی گذری،اوڑک=آخر کار،چِت=دل ،ویندے=جاندے ،سنگ سہیلی=صحبت مجلس وچ رہن والی سہیلی،سیاں =سکھیاں ۔سہیلیاں