ورقہ 463

8658
کئی کوہ قاف سمندر لنگھے کئی شہراں کئی برّاں
آن مصر دی حد وچ لتھے شور مچائے نراں
8659
نیل ندی دے دندے اترے شہروں دور کنارے
جھنڈے چھتر نشان کھلوتے گجے ڈھول نقارے
8660
لتھے ڈیرے گرد چوپھیرے وجن بھیراں تُریاں
راکس دیو مریندے نعرے ناچ اُٹھائے پریاں
8661
چٹکی تاڑی تال ترانہ مجرا ہوئے شہانہ
ملکاں وچ حسن دا چانن پھریا نیک زمانہ
8662
شادی دے شدیانے وجے چھیڑے ساز قوالاں
نچن پریاں زیور بھریاں مکھ مانند مشالاں
8663
کتے سپاہی لکڑی کھیڈن پھڑ گتکے ہتھ ڈھالاں
کدھر نوبت گھُرے محمد پان ملنگ دھمالاں
8664
سندر پریاں ملک سُہایا روپ بھکھے من بھانے
پھرن اُڈار بازار بغیچیں سوہے ساوے بانے
8665
ملکاں اندر خبراں ہویاں آئے شاہ ہمارے
لے تحفے نذرانے بھارے لوک ملے ونجھ سارے
8666
میر وزیر اتے سر کردے ساک اشناکر موہراں
شاہزادے توں صدقے سُٹن اشرفیاں دم مُہراں
8667
سارے ملک مصر دے اندر جیو جیوسی سدھرایا
گھر گھر ڈھول خوشی دے وجے شاہزادہ مُڑ آیا
8668
ہر اک شخص مِلن نوں آیا نذر سوغاتاں گِھن کے
بھُکھے لوک تونگر ہوئے صدقے داتاں گِھن کے
8669
دیواں تے عفریت کہاراں جیہناں سی مُڑ جانا
خلعت نعمت بخش نوازے دان دتا من بھانا
8670
راضی کر کے گھر نوں ٹورے دے دے راضی نامے
سبھو گئے دعائیںدیندے لے دولت زر جامے
8671
مصری لوک تمامی آئے استقبال شہاں دے
سر صدقے دے مُہراں موتی رُلدے وچ رہاں دے
8672
بگھی بہل کرنچی آئی پینس گڈ کچاوے
ہاتھی ' گھوڑے 'اُٹھ' خچر دا انت نہ پایا جاوے
8673
کشتی بیڑی پانی وچدوں آن ہوئے سن حاضر
مال متاع اُوہناں وچ پایا جیونکر بھرن سوداگر
8674
سد نجومی ساعت کڈھی خوب مہورت لے کے
نال مبارک چلی ڈولی راہ مصر دے پے کے
8675
بابل پُت سوار ہوئے سن کر آئین شہانی
پالکیاں توں سٹن موتیں کر کر زر قربانی
8676
اشرفیاں زر مُہراں موتیں پیراں ہیٹھ ملیندے
کس نوں حاجت رہی چُنن دی سبھ تونگر تھیندے

لفظالی:
برّاں = خشکی دے قطعے ، نر= خیالی مخلوق جہدے وچ انسان تے گھوڑے دے انگ ہوندے نیں ۔ نر گھُڑ ۔ قنطور، دندے= کنڈھے ، نشان = گڈن والا جھنڈا ، بھیراں = نوبت ۔ نقارے، تُریاں = فوجی بگل، پُریاں = راجہ اندردے سورگ اندر پُری دے ناچ، چٹکی = انگوٹھے تے درمیانی انگلی وجن دی آواز، تاڑی= تالی ، ترانہ = گاون دی اک قسم جیہڑی حضرت امیر خسرو دی کاڈھ اکھواندی اے، مُجرا = گویّے تے رقاصہ ولّوں سلام آداب دے طورتے پیش کیتا ہویا پروگرام ،شدیانے= شادیانے ۔ خوشی دے گیت، لکڑی کھیڈنا=ہتھ وچ گتکا پھڑ کے چھیتی چھیتی چلانا ۔ پٹا کھیلنا ،سُہایا= سجایا ، روپ بھکھے= حسن شعلہ افروزہوا، من بھانا=دلی خواہش مطابق ، اڈار= سوہنیاں دیاں ڈاراں ، کرموہراں= پہل کرکے اگیچ ہو کے ، بابل پُت= پیو پُتر ، مہورت= کسے کم کرن لئی مقررہ وقت ، منٹ سیکنڈ گھڑی پل تک، بہل = بیل گاڑی ، کرنچی= اوٹھ گڈی، راضی نامے= تعریفی سند، مُہر= اشرفی توں وڈا سونے دا سِکّہ ، دم= دِرم دام