ورقہ 464

8677
مِلکاں وچ نہ میوے خلقت دین مبارک آئی
سیف ملوک لیایا ڈولا مولیٰ خوشی وکھائی
8678
کئی صندوق خلاص کریندے چھٹے دیندے زردے
زوریں شوریں ایہنِیں ٹوریں پہتے وچ مصر دے
8679
چج دستور رسوماں سبھو کر وڈیاں دے چالے
ڈولی ستریں داخل کیتی شاہاں تخت سمبھالے
8680
سبھ مُلکاں وچ پھرے ڈھنڈورے جوجو بھکھے ننگے
شاہاں دے در حاضر ہوئے دولت دے دے رنگے
8681
درساں اندر خرچ پوائے نالے وچ سرائیں
بہت طعام پکا کھلائے عاماں خاصاں تائیں
8682
نویں سروں کئی لنگر لائے مِٹھیاں کئی سبیلاں
خلعت بخش ودھائی عزّت اشرفاء اصیلاں
8683
قدر بقدری خلعت لدھی ہر چاکر امرائے
بخشش دا کجھ انت نہ رہیا گِن گِن کون سنائے
8684
نال اوہدے ونج موئے آہے جو جو لوک وفائی
سبھناں دے گھر گیا شزادہ ہر خانے ہر جائی
8685
ٹُر گھر جاندا نالے کردا عذر بے انت شماراں
دولت مال جگیراں دتیاں سبھناں دیاں گھر داراں
8686
سبھو لوک اسودے ہوئے دھن رزقوں گزرانوں
شاہزادے نون دین دعائیں راضی دلوں ایمانوں
8687
خیر سکھاں سنگ آیا بیٹا آس پُنی سرکاروں
عاصم شاہ خیرایت کر دا باہر حد شماروں
8688
پیر فقیر شہید منائے دے دے نذر نیازاں
راہاں اُپر خرچ پوائے نعمت بے اندازاں
8689
اَنھے لُوہلے ہور ازاری عاری لوک تمامی
طلباں لاء سُلکھےّ کیتے عےشاں کرن مدامی
8690
عالم فاضل زاہد صوفی فقراں گوشے گیراں
نعمت مال پوشاکاں دتیاں سے دھرم ارتھ جگیراں
8691
جوسی پنڈت جو سی رملی پاہندا جوگ نجومی
سبھو رج رج دولت لیندے رسموں ودھ رسومی
8692
جس گھر دھی کواری آہی خرچ دتا اس تائیں
گہنے داج پوشاکاں دتیاں زینت کر پر نائیں
8693
جو مسکین یتیم مسافر خستہ حال شکستے
سوکھے تے اسودے کیتے کر عُمدے بند بستے
8694
ہویا معاف رعیت اُتوّں تین برس دا ہالہ
خوش کیتا مظلوماں تائیں کر کے عدل سنبھالا
8695
امن امان رہیا وچ خلقاں ہِل نہ رہِیا کائی
رنڈی تتی دے دعائیں پایا سُکھ لوکائی

لفظالی:
مِلکاں = خیراتی نیک کماں لئی وقف کیتی گئی جائداد عمارت یتیم خانہ مدرسہ سرائے ، خلاص کریندے = خالی کر دے ، ٹور= چال رفتار۔ روش، ستریں = پردے والے مکان وچ، مُلکا ں= آبائی علاقے ۔ اپنی جان پچھان والی جوہ ٹ ک ٣٠ کھڑی مُلک، رنگے = سماجی مقام بدل دتا، درس= درسگاہ ، سبیل = مفت پانی پلان دی ٹینکی سنے آبخوریاں دے، قدر بقدری= درجے سیتی، وفائی= وفادار، ہرجائی= ہر تھاں تے ، عذر کرنا= معذرت معافی منگنا، گھرداراں = گھروالیاں نوں ،سرکاروں=بادشاہ سلامت ولّوں ،اسودے= باآرام ، آس پُنی= اُمیدپوری ہوئی، لدھی = ملی حاصل ہوئی،راہاں اُپر خرچ پوائے= چلدیاں راہاں تے مسافراں لئی ان پانی دا انتظام کر دتا، ازاری= روگی ، عاری= کم کارکرن دے نقابل ۔ محروم ، طلباں = ماہوار وظیفے، سُلکھے= خوش بخت، گوشے گیر= دنیا توں اکلوانجے اکلے رہن والے درویش ، سے=سینکڑے ، دھرم ارتھ جگیر= ٹ ک ٤٧، جوسی= جوتشی ، رملی = رمل دے علم نال قسمت دا حال دسن والا،پاندھا= قسمت دا حال دسن والا پنڈت، جوگ= جوگی، رسموں ودھ= مقررہ فیس توں زیادہ، رسومی= لاگ منگن والا،ہل نہ رہیا=سخت ڈسپلن پاروں کوئی چوں نہیں سی کردا۔ ہلیا نہیں کہ سلّھیا نہیں(عطیہ میاں سکندر صاحب)،