ورقہ 465

8696
اتنی خیر خیرایت کیتی مایا ونڈ اُڈائی
سبھ کنگال تونگر ہوئے چھُٹی ٹُکر گدائی
8697
ننگا بھُکھا کوئی نہ رہیا وچ ولایت ساری
گھاٹ معاف زکاتاں ہویاں کرن بپار بپاری
8698
دتے خرچ مسیتاں اندر درویشاں علماواں
بندیوان خلاص کرائے پُت ملائے ماواں
8699
لشکریاں نوں چھُٹیاں دتیاں دے طلباں انعاماں
ظالم رہزن دور کرائے خوشیاں ہور تماماں
8700
دفتر دور غماں دے ہوئے مارے خوشی نقارے
عاصم شاہ جشن وچ بیٹھا ہور اکابر سارے
8701
پین شراب رباب سنیندے کر دے نُقل کبابوں
کھاون کھانے جومن بھانے وافر خوشی حسابوں
8702
بھگتی بھنڈ نچن ہربابی انت نہ بازی گر دا
پیرنیاں نٹ کرن تماشے مُجرا نِت کنجر دا
8703
پاون بیلاں وانگر میلاں خوشےیں میر شزادے
دن چالیھ ایہ جشن کیتو نیں دم دم چین زیادے
8704
شاہ عاصم شکرانے پڑھدا ونڈدا بہت خزانے
سر سجدے تھیں چائے تھوڑا کرے ادا دوگانے
8705
شاہزادہ پھڑ تخت بہائیوس دے پنداں تلقیناں
آپ عبادت خانے وڑیا وانگر اہل یَقیناں
8706
نفل نمازوں ہوئے نہ فارغ دم دم حمد دھیاوے
رات دینہاں وچ گوشے رہندا مجلس وچ نہ آوے
8707
عادت ہوئی عبادت والی لذت زہد پیو نیں
پچھلے ورد صفائی دتی اوہو کار لیونیں
8708
یاد ربے دا صواد جنہاں نوں بن یادوں گھٹ کٹدے
جِبھوں رت سلونی لگدی پالذت وت چٹدے
8709
چالیھ چلے جیہناں نوں گذرے گوشے بہن سُکھایا
دل دا عوُد محبت آتش اندر دھوپ دُھکھایا
8710
اوہو مشک مغز وچ رچدی ہور نہ بھاون بوئیں
دُنی سنسار ہنیرا دسدا گوشے اندر لوئیں
8711
گوشے گیر آزاد محمد تنگ ہوون بہوں گلیں
بہتر ہے ہن عاصم ولوں شہزادے ول چلیں
8712
سیف ملوک تخت پر بیٹھا تاج سرے تے دھریا
لِکھن پڑھن میرے تھیں باہر جو نذرانہ تریا
8713
راجے رائے سلامی ہوئے پر جا فوج شہزادے
چمن تخت دھرت دے اگے سبھ سوار پیادے
8714
جاں اوہ قدم تخت پر دھردا سبھو سیس نِماندے
خدمت وچ امیر شزادے کھلے رہن جیوں باندے

لفظالی:
مایا= دولت، ونڈ اُڈائی= بے تحاشاورتائی، ٹکر گدائی چھٹی= در در دے ٹکر منگن نوں نجات مِلی، گھاٹ= بیوپاریاں دا مال دریا توںپار لنگھاون دا محصول، زکاتاں= زکوٰۃ بچت تے ڈھائی روپے سینکڑہ دین داحکم اے، ( جدوں سرکاری خزانے ونڈ کے اڈائے گئے تے ملک وچ کنگال بُھکّھا ننگا کوئی نہ رہیا پھیر گھاٹ زکاتاں لین دی کیہ لوڑ سی) بندیوان= قیدی، طلباں = تنخواہاں ، دفتر= ریکارڈ ۔ رجسٹر، دفتر دو رہونا= ریکارڈ دی پروانہ کرنا، نقل = شراب پین مگروں نشہ ودھاون لئی کوئی مٹھی شے یا بھُجا گوشت ، بھگتی= کڑیاں دا بانا لاکے نچن والے منڈے ، ہربابی= ہر بوہے اَگے جاکے نچن والا مانگت ، پیرنی = پیرنا قبیلے دی عورت جو نچن دا پیشہ کرے، بیل = اپنے ناں دا اعلان کرو اکے نچن گاون والے نوں دتا گیا انعام ، دوگانہ = دو رکعات نماز شکرانہ، پند= نصیحت سکھاون والے سنہری قول ، حمد دھیاوے= شردھا نال رب دی تعریف کرے ، گوشہ = اکلوانجے ملّی کوئی گُٹھ، دُھوپ = جن بھوت کڈھن لئی عود تے حر مل دی دھونی ، نذرانہ تریا= رعایا نے نذرانہ تاریا، پرجا= رعایا، دھرت = تخت دے سامنے دی دھرتی ، سیس نمانا= سر جھُکانا، باندے= بندے ۔ غلام ،