ورقہ 466

8715
جسدم باہر سواری چڑھدا فوجاں گھٹاں بناون
رعد مانند نقیب اچیرے گجدے بھجدے جاون
8716
پوشوپوش کریندے شاطر انبر تیک اوازے
نویں نویں سر چھتر جُھلیندے آسن تازی تازے
8717
پریاں دیو غلام چوپھیرے آدم انت نہ کائی
قدماں ہیٹھ تمام رعیت سر تے ظل خدائی
8718
جت ول شاہ ارادہ کردا سیر شکار کرن دا
کوتل لکھ اُڈیکُو ہووے پیر رکاب دھرن دا
8719
جس ولایت ملک شہر ول کردا شاہ ارادہ
اگوں ملدے نال چڑھیندے لکھ سوار پیادہ
8720
دم دم شان اقبال زیادے دن دن زور سوایا
کوئی غنیم نہ رہیا کدھرے ہر اک قدمیں لایا
8721
سُکے باغ ہوئے مڑ ساوے آ وڑیا وچ مالی
بنے چمن وچ رنگ ہزاراں پھُل کڈھے ہر ڈالی
8722
سرو قیاماں وچ کھلوتے نِیتے شُکر دوگانے
شاخاں مُکھ زمیں پر رکھے کر سجدے شکرانے
8723
نہراں خشک ہویاں پھر جاری دھوتی دھوڑ غماں دی
سبزے تیز زباناں کر کے حمد بجا لیاندی
8724
سچے سخن اسمانی گھلدا موتی شبنم والے
میوہ پینگھ خوشی دی جھُجےّ خوشیں جھُولن ڈالے
8725
عدل سخاوت کم ہمیشہ وانگر حاتم طائی
دب دبا سکندر والا جُھکدی بہت لوکائی
8726
عزّت صورت سیرت ساری یوُسف وانگ نمونہ
سر پیراں تک جُثہّ روشن عشقوں سی اندرونہ
8727
ہتھ مبارک نال انگوٹھی نبی سلیماںؑ والی
پریاں تخت ہوا اُڈاون شان دتا رب عالی
8728
دیو عفریت اتے جنّ آدم تابع سبھ حکم دے
ہتھیں بدھّیں رہن کھلوتے فرماندار ہر کم دے
8729
شاہ شاہپال دیواں نوں گھلدا نِت نویاں دے چیزاں
ٹبراں وانگ منگائے خبراں جانے مثل عزیزاں
8730
نویں نویں نت تحفے گھلدا نذراں نُزل سوغاتاں
خوشبوئیںپھُل باغ ارم دے میوے ذات بذاتاں
8731
ہور عجائب چیزاں گھنیاں بیٹی کارن گھلدا
شہر مصر ول راہ دیاں دا رہے ہمیشہ چلدا
8732
راج ولوں شاہزادہ ہویا جم سلیماں ثانی
شارستان پرستاں توڑی مُہر چلی سُلطانی
8733
خوشیاں دی کجھ رہی نہ باقی دولت عشرت شاہی
عُسروں یُسر محمد بخشا کیتا فضل ا لٰہی

لفظالی:
رعد= کڑکن گجن والی بجلی، شاطر= بادشاہی سکیورٹی دستے دا جانباز کمانڈو، پوشو پوش= نقیباں ولوں لائی گئی آواز ہٹو بچو( مصدر پوشیدن توں کِتے لُک چھُپ جاؤ)انبر = اسمان، ظل خدائی= الٰہی سایہ ۔ خدا دی سرپرستی ، اڈیکو= منتظر ، کوتل = نمائشی گھوڑا جس تے کدے وی سواری نہیں کیتی گئی ، غنیم = دشمن ، ساوے = ہرے ، رنگ= رونق میلے ڈرامے، سرو= سِدھا اُچا لما رُکھ ، باقی =کسر کمی،قیام= نماز وچ سدھے کھلونا ، دوگانے= دو رکعاتاں ،شاخاں مکھ زمین ۔۔۔۔۔۔= پھل دے بھار نال زمین تے لگیاںٹہنیاں شکر گزار نیں ، سبزہ = گھاہ بوٹ، زبان = Blade of grassنوں زبان نال تشبیہ دیندے نیں ، جُھجّے= جھُولے۔ ہونٹے لئے ، ذات بذاتاں= ون ون دے ، جھولن = جھُولنے، فرماں دار= فرماں بردار، نُزل = کسے دی خاطر تواضع لئی بنائی اچیچی شے، ذات بذاتاں= ون ون دے ، گھنیاں = چوکھیاں ، جم = جمشید ، عسروں یُسر= ٹ ک ق م الم نشرح:4,5آسن = سواری لئی پِٹھ تھلے،