ورقہ 468

8751
پنجر وچ اداسی ہوئی بلبل مست چمن دی
پھاہی گر نے لائی کُڑِکی قید مُکی جل اَن دی
8752
عاصم شاہ بُلایا بیٹا سینے چھِک لگایا
پند وصیّت دتی نالے الوداع بُلایا
8753
سُکھ وسو تم سیف ملوکا ٹریا باپ سفر نوں
ماتم سوگ نہ کرو سفر دا چلے اصلی گھر نوں
8754
جاں تدھ سفر تیاری کیتی لگی اساں جدائی
مڑ مڑ موڑ رہے ساں تینوں خبر نہ آہی کائی
8755
جیہناں چھک سجن دی لگی پھیر نہیں مُڑ بہندے
اج سانوں کوئی موڑ نہ سکدا نہ موڑے ہن رہندے
8756
الوداع تساں تھیں مینوں کیتا یاد سہیلی
اللہ بیلی جان اکیلی چلی چھوڑ حویلی
8757
لے کے نال گیا جو آیا قاصد تیز سجن دا
عاصم شاہ پیالا پیتا ہویا آہر دفن دا
8758
حرماں اندر گریہ زاری حدوں ہوئی زیادہ
آہیں ڈھاہیں کھلئیں باہیں روندا کھلا شہزادہ
8759
میر وزیر رعیت روندی لشکر دے سرکردے
کیوں شاہا منہ کج اساں تھیں ہو چلیوں پس پردے
8760
تدھ نہیں پرواہ اساڈی حوراں خدمت گاراں
کون اسانوں یاد کریسی یار ملے جد یاراں
8761
سانوں لکھ محتاجی آہی درسن دے سدھرائے
اک اک دم دی صحبت تیری سو سو عیب گُمائے
8762
اک اک سخن مبارک تیرا آہا لعل رُماّنی
ہر ہر پند تساڈے اندر ہر دل دی زندگانی
8763
لطف احسان مروت شفقت کرسی کون اجیہی
شالہ چھِک محبت تیری کدے نہ ہووے بیہی
8764
مغفِرَت کرے رب تینوں دیندے اسیں دعائیں
راضی رہیں اساں پر دائم متھے وٹ نہ پائیں
8765
کفن صندوق تیار کیتو نیں غسل دتا علماواں
ظاہر باطن چھتر نورانی سر پر کردے چھاواں
8766
نال ادب دے کفن پہنایا بند سوہنے بنکائے
کیسر عنبر عطر گلابوں بھر شیشے چھنکائے
8767
شہر خموشاں دے ول چڑھیا عاصم شاہ مصر دا
فوجاں دا کجھ انت نہ رہیا صدقے گنج گہردا
8768
اوس نگر وچ اگے آہے اس تھیں وڈے وڈیرے
شاہی چھوڑ رہیا ہو بردہ دھرت اُتّے کر ڈیرے
8769
جاں تابوت پیو دا ٹریا سیف ملوک شزادے
صدقے خیر خیرایت دتی حدوں بہت زیادے

لفظالی:
پنجر=پنجرا،جل ان =ان جل ۔دانہ پانی،چھک =کھچ کے،سہیلی =فقیری زبان وچ جانی جان تے ہمراز نوں سہیلی آ کھدے نیں(اللہ تعالیٰ)، تیز قاصد=عزرائیل فرشتہ،پیالا پیتا=وصل دا جام نوش کیتا ،آ ہر =اہتمام ،حرماں اندر = شاہی زنان خانے وچ ،پس پردے=پردے پچھے ۔غائب،درسن = درشن ۔دیدار،سدھرائے=ریجھوان،گمائے =گوائے،لعل رمانی=یاقوت۔ جواہر پارہ ،پند=سیانے دی مت ،کدے نہ ہووے بیہی =ہمیشہ تازی رہے،متھے وٹ پانا=تیوڑی چڑھانا۔ناراض ہو جانا،وٹ=شکن ،بنکائے=بنداں نوں ول دے کے بنھیا ،شیشے=بوتلاں۔ صراحیاں ، چڑھیا=چڑھائی کیتی،بردہ=زرخرید غلام ،دھرت=دھرتی،تابوت=وڈے آدمی دی لاش دفناو ن لئی بنایا گیا لکڑی دا صندوق، وصیت=جاندی وار دے اقرار جنہاں تے وارث عمل کر دے نیں ، پند= نصیحت بھرے قول،