ورقہ 469

8770
رُپے مُہراں لعل جواہر مانک موتیں ہیرے
اس تابوت اتوں سن سٹے چُن چُن رجے کِیرے
8771
جیونکر سیف ملوکے اُتے بابل سی زر لائی
تیویں سیف ملوک پیو دی کھٹی گھول گھمائی
8772
قدر موافق صدقے دتے کر اسقاط جنازہ
شاہ محل وچ داخل ہویا بند کیتا دروازہ
8773
فاتحہ آکھ گھراں نوں آئے روندے تلیاں ملدے
ہئے ہئے دنیا تے کس رہنا بھلے بھلیرے چلدے
8774
ایہ پُل پُور لنگھاون ہارا جو آیا اُس ٹرُنا
کون مقامی ہر دے سر تے کُوچ نقارہ گھُرنا
8775
دنیا باغ پرانا بھائی نویں نویں پھل بندے
پھُلّن سات چُنیندے بعضے اک کوئی روز وسندے
8776
ہر اک شاخ عمر دی نالوں توڑ کھڑے جد مالی
پتّاں پھُلاں پوے وچھوڑا رو رو کہندی ڈالی
8777
پیٹوں پاڑ شگوفے کڈھے پھُل ہوئے رنگ والے
مالی تروڑ بازاریں سٹے بُرے وچھوڑے ڈالے
8778
اساں اُوہناں کد ملنا مُڑ کے پئی ہمیش جدائی
روون پھُل محمدبخشا رج نہ شاخ ہنڈائی
8779
کئی بہاراں ہو ہو گیاں ڈھٹھے پت بچارے
کئی ہزاراں بھور گلاں دے کر کر گئے نظارے
8780
جاندے کئی نہ نظریں آئے گُل پھُل بھور ہزاراں
دستاراں سر مٹی ہوئی سیکڑیاں سرداراں
8781
لاکھاں سرو ازاد اُچیرے ہو ڈھہٹھے سر پرنے
لکھ لالے رنگ لالاں والے گالے داغ ہجرنے
8782
کہاں گئے جمشےد فریدوں بہمن ناگ ڈنگالا
کیخسرو تے رستم دستاں سام نہ ہویا سمبھالا
8783
کیکاؤس سیاوش کتھے کہاں سکندار دارا
افلاطون ارسطو کتھے کر دے عقل پسارا
8784
دنیا نال نہ گئی کسے دے ٹُر ٹُر گئے اکلےّ
اوہو بھلے جیہناں چھنڈرکھے اس دُھوڑوں ہتھ پلےّ
8785
جمدڑیاں وچ خاکوں سُتے چکڑ پیر نہ بھریا
اس جوئے جس بازی لائی کس نہیں دھن ہریا
8786
دانشمنداں دا کم ناہیں دنیا تے دل لانا
اس بُہٹی لکھ خاوند کیتے جو کیتا سو کھانا
8787
جس چھڈی ایہہ بچے کھانی سویو سُگھڑ سیانا
ایسی ڈائن نال محمد کاہنوں عقد نبھانا
8788
نت نویں ایہ بن بن بہندی بُڈھی مول نہ دِسدی
ہر اک سنگ کریندی گوشے نہیں اِکیّ پر وسدی

لفظالی:
مہر =اشرفی توں وڈا سونے دا سِکّہ،رُپے =چاندی دا وڈا سِکہ،مانک=قیمتی۔منکا۔یاقوت،کیرے=بہت ای کنگال غریب غربے،زرلائی =دولت خرچی،گھول گھمائی=صدقے واری کیتی،اسقاط=میت دے پاپ جھاڑن لئی کیتا گیا صدقہ خیر خیرات،محل =قبر،گھُرنا=وجنا۔ کھڑکنا،چنیندے=چنے جاندے نیں ،پھلن سات =کِھڑ دیاں ای،شاخ عمر= ٹ ک کئی بول گئے شاخ عمر دی تے ایتھے آ ہلنا کسے نہ پایاای بند ۔ہ و ٥٢٥ ٹ ک مدد القاموس Lane، عمر دی ٹہنی۔ جیون سماں، عمری= اک گھنا شاخ دار رُکھ، عمر= اک سنگھنا رُکھ، کو ن مقامی= سارے پردیسی نےں، سردار = جرنیل ۔ فیلڈ مارشل،شاخ=شاخ عمر، سروآزاد= سدھا اچاّ لماّ رُکھ جیہڑا ایدھر اودھر کھلارا نہیں کر دا، بھور=بھونرے، ڈھٹھے= ڈِگے، سرپرنے= سر دھرتی نال تے جڑھاں اسمان ول ، لالے = پوست دے پھُل گل لالہ، سنبھالا نہ ہونا= قائم نہ رہنا، عقل پسارا= منطق دا کھلار۔ فلسفہ، دُھوڑ= آلودگی، ہتھ پلے چھنڈ رکھنا= کجھ رقم جمع نہ کرنا پلے ککھ نہ بنھنا، سوکھانا= اوہ ای کھالیا، عقد =نکاح، بچے کھانی= دنیالئی نندیا بھری گالی، گوشے کرنا= اکلوانجے ہو کے راز داری دی گل کرنا،