ورقہ 470

8789
سوئیو نیونہہ لگاندا اس دا شامت آئی جسدی
ہر بھرتے دا بھُرتا کیتوس بنی محمد کس دی
8790
ہو ہو گئے تخت دے سائیں تاج سراں پر دھرکے
مہراجے سلطان کہائے شان اُچیرا کر کے
8791
ننگیں پیریں گئے بے دیسیں خاک رلے سبھ مر کے
کہو کے مان محمدبخشا رہو نمانے ڈر کے
8792
ماتم سوگ سنسار تمامی جاء خوشی دی ناہیں سمجھ کداہیں
اک اک قدم شہاں دے سر تے خلق ٹرے جو راہیں ویہڑے پاہیں
8793
پھیر نہیں مڑ آون لگے نیر گئے وگ واہیں بوکے لاہیں
جو کرئیے سو اج محمد بھلک نہ ہوگ اتھائیں بھرسیں آہیں
8794
پینگھاں بہت ہلارے چڑھیاں ترٹ زمیں پر جھڑیاں
کُڑیاں پھیر نہ مُڑیاں پیکے ساہوریاں چِھک کھڑیاں
8795
موتیں کدے ملے مڑ سپاّں ونج پئے وچ لڑیاں
ڈگیاں پھلیاں خاکو رلیاں پھیر رکھیں کد چڑھیاں
8796
جت ول ویکھو فکر جدائی کتے ملاپ نہ سُکھ دا
لنب انگار نہ کٹھے رہسن ات غم دھؤاں دُھکھدا
8797
سُن مُرلی دی لکڑ کولوں درد وچھوڑا رُکھ دا
سبھناں دا ایہہ حال محمد کہو کے حال منکھ دا
8798
مٹی گھٹے رُلدا جاندا جو کوئی سندر مُکھ سی
گھاٹ ملے دل رلیا نہیں تاں کُس کُسے دی بھُکھ سی
8799
دُکھ دِکھا گئے ٹُر اگے جہناں اساڈا دُکھ سی
مطلب دے افسوس محمد کون اسانوں جُھکھسی
8800
کتھے گل گئیوں اُٹھ کِتھے کر کجھ سُرت فقیرا
قصہّ چھوڑ وڑےں وچ حالاں بھج بھج تُرت فقیرا
8801
ہو رضا قضاء مَنیّ سی جے کجھ رب ارادہ
ماتم فاتحہ خیر درودوں فارغ ہویا شزادہ
8802
ٹھپ کتاب غماں دی رکھی شادی دفتر پھولے
جیؤں کے تیؤں اقبال حکومت پین نہ دِتے رولے
8803
نویں لئے سروپا وزیراں صدر چڑھے مُڑ صدرے
فوج رعیت اندر ورتے خلعت قدر بقدرے
8804
کردا عدل انصاف شزادہ خلق مراداں تکے
سخت سزا تنبیہاں لیندے ظالم چور اُچکےّ
8805
میلی نظرے ویکھ نہ سکے باز کبوتر تائیں
پتن تے رل پانی پیندے شےر ببر تے گائیں

لفظالی:
بھُرتا =خاوند۔ سپورٹر، سنسار= جگت۔ دنیا ، نیر گئے وگ واہیں = جیہڑے پا نی ندیاںوچوں وگ کے اگانہہ چلے گئے نیں ، بوکے لاہیں = بوکے لج دے ذریعے وگے پانی ، لنب= اگ دی لاٹ، سُن مرلی دی لکڑ۔۔۔۔۔۔= ٹ ک مثنوی مولینا روم بشنواز نے چوں حکائت می کند وز جُدائی ہا شکایت می کند، مُنکھ=انسان ، گھاٹ مِلے= جیون پتن تے عارضی ملاقات ہوئی، جھُکھسی = جھُرے گا۔ افسوس کرے گا، سُرت = ہوش ،ہو رضا= راضی ہو کے، سروپا= سرتوں پیراں تائیں کجن والی خلعت، صدر چڑھے مُڑ صدرے= راج پردھان مُڑ پر دھانگی دی کرسی تے جا بیٹھے، ورتے = ونڈے ، قدربقدرے= درجہ بدرجہ گریڈ مطابق، تنبِیہ= وارننگ۔ اگوں جرم نہ کرن دے عہدنال معافی، میلی نظر= بد نیتی دی نظر،