ورقہ 471

8806
بھیڈاں تے بگھیاڑ اکٹھے پھردے وچ اجاڑاں
کوئی کسے نوں چھیڑ نہ سکے عدل چِھکایاں واڑاں
8807
پیو دادے دے کسب ہنر تھیں ہر کوئی کرے کمایاں
دھاڑو مارُو کرن مزوری چور کریندے لایاں
8808
جس جس کم دے لائق کوئی تس تس کم تے لایا
دانشمنداں لائق داراں پایہ عالی پایا
8809
ملکاں اندر خوشیاں خوشیاں دیندا جگ دعائیں
ظِلّ اللہ اساڈے سر تے رہے قیامت تائیں
8810
ظلم ستم دا پٹ گُمایا جس نے تخم زمینوں
عالم اُتے دیوا بلیا صدق اسلاموں دینوں
8811
لنگر درس لوائے شہریں راہاں وچ سبیلاں
آس منداں دی آس پُچاوے بُجھے شاہ دلیلاں
8812
نال بدیع جمال پری دے رج رج خوشیاں کردا
اوّل کوڑا زہر محمد مٹھا پھل صبر دا
8813
عاشق تے معشوق دوہاں دے چانن چین اُجالا
شاہ پری دے پیٹوں ہویا بیٹا صورت والا
8814
دم دم شکر الٰہی پڑھدے پُنیاں سبھ مراداں
بہتی عمر گزاری دوہاں عیشاں نال صواداں

سیف الملوک دا وفات پانا تے بدیع الجمال دا اوہدے درد وچ رونا

8815
ہائے افسوس اوہناں دا جیہڑے سکدے مِلن پیارے
سینے لاون اِک ہو جاون غم بھلاون سارے
8816
دھوتے جان غبار دلاں دے چنتا رہے نہ کائی
عیشاں خوشیاں وچ گزارن کوئی دن نال صفائی
8817
اچن چیت ہنیری جُھلیّ شمع خوشی دی بُجھی
باغ دِلاں دے پٹ اڈاے خزاں ہجر دی سُجھیّ
8818
دھندوکار غباری پاوے مارومار کریندی
باغ وصل دے اندر آوے زیب خوار کریندی
8819
لمیّ ہری امیداں والی ڈالی تروڑ گواوے
خوشیاں دے بھن ڈال تمامی ڈال زمیں پر جاوے
8820
سیف ملوک ہویا رنگ رتا نال بدیع جمالے
سدا ملاپ آرام دوہاں نوں غم نہ خواب خیالے
8821
اندر باہر خوشی پری نوں نہ دکھ درد نشانی
نہ کوئی خبر وچھوڑے والی نہ کوئی فکر جہانی
8822
سال پنجاہ پیؤ دے پچھوں سیف ملوک لنگھائے
بھر بھر پیتے وصل پیالے تروٹک دے دن آئے

لفظالی:
چھکایاں واڑاں = حفاظتی چار دیواری وچوں ہٹا دتی عدل نے اینا خوف طاری کیتا کہ کسے نوں جرت نہیں سی پیندی بھانویں واڑ نہ وی ہووے، دھاڑو=ڈاکو، مارو= قاتل، لایاں = فصل کٹن دیاں مزدوریاں ، لائق دار= لیاقت رکھن والے، پایہ = درجہ ۔ رتبہ ، ظل اللہ= بادشاہ دے سِرتے(چھتر) رب دا سایہ سمجھیا جاندا سی، گمایا= گوایا، تخم = بی، دلیل= من دی سوچ، اجالا= ظلم ہنیردا اُلٹ ۔ روشنی ۔ نیک نامی، پُنیاں = پوریاں ہویاں ، سِکدے = ملن لئی تڑفدے،چنتا = فکر اندیشہ، اچن چیت= اچانک ۔ جس دا کوئی چِت چیتا تے ہوون دی نشانی نہ دسے، سُجھی= نظر آئی، زیب= سجاوٹ پھبن، ڈال=وڈے ٹاہن، ڈال = سُٹ ۔دھر، تروٹک= نشے دا گھاٹا ، عیشاں نال صواداں= منظور شدہ صحیح جائز عیشاں نال ( بے لگام عیش نال نہیں)
، رنگ رتا=عیش عشرت وچ ۔رنگیا(رُجھا)