ورقہ 473

8842
ایس دُکانوں اُٹھ کھلوتے ہوئے وداع جہانوں
وطن مقام پسند کیتو نیں لا مکان مکانوں
8843
کن آواز پری نوں جس دم پایا پاون ہارے
ہو بے ہوش زمیں پرڈھہٹھی جان پران وسارے
8844
کتنے روز بے ہوش رکھی سی دہشت ایس سخن دی
عاشق کیونکر جرن محمد سُن بد خبر سجن دی
8845
جاں کوئی ساعت ہوش سنبھالی ملدا ایہ آوازہ
مڑ ہوندی بے ہوش نمانی درد ایہو کر تازہ
8846
بہتے روز گزارے اینویں اوڑک اکھ اُگھاڑی
سیف ملوک نہ نظری آیا ہوئیوس حشر دہاڑی
8847
نہ اوہ شاہ تخت پر ڈٹھوس نہ تابوت روانہ
اکو خبر سنائی لوکاں اوہ تک کیتا خانہ
8848
چھاتی تے ہتھ مارے اول جھگّا پاڑ گُمایا
مت ایہ دُھؤاں باہر نکلے سینے منگھ بنایا
8849
ہتھوں ہور پئی اس منگھوں بجلی درد قہر دی
سٹردی بلدی اُٹھدی جھڑدی نہ جیوے نہ مردی
8850
چُوہنڈاں مارے ماس اتارے چِھل سُٹیوس رخسارے
رت بچھول ہویا سبھ چہرہ سرخ ہوئے ہتھ سارے
8851
وٹ مٹھیں وٹ مارے چھاتی وٹ پئے جد سینے
وٹ لئے دُکھ عشق بپاروں دے کے سُکھ نگینے
8852
پِٹ پِٹ پَٹ کیتے پَٹ رتے پٹ پٹے گھت گھٹے
سٹ سر سٹ سڑی دی لیندی بھن زیور سٹ سٹے
8853
پٹک پٹک زمیں پر پٹکے پٹکے کھاپھٹک دے
کٹ کٹ ہتھ پیوے رت گٹ گٹ مارے درد کٹک دے
8854
اندر لاٹ لٹکدی لٹکے لوٹی لٹک لٹاکے
درد وچھوڑے پھاٹک پایا منہ منہ مار پٹاکے
8855
کدے طمانچے منہ پر مارے کدے گھتے ہتھ والاں
توڑے چھِک کنوں چھِک والی تروڑسٹی دھن مالاں
8856
زلف پٹی کر مینڈھی مینڈھی گلّھیںناگ کھلارے
اوسے نوں سبھ ناگنیاں نے مڑمڑ کے ڈنگ مارے
8857
جاں بے تاب ہوئی رہ مکی پٹ کُٹّیوں بھن ونگاں
کر کر وین لگی پھر روون کوکے وانگ کُلنگاں
8858
کتھے شاہ سنگار تخت دا بھاگ سُہاگ تتی دا
کرسی کون غریب نوازی چاہ وراگ تتی دا
8859
کیوں اوہ سفر اجل دے ٹُریا ایڈ شتابی کر کے
میں پھڑ پیر رکاب نہ چُمےّ سر قدماں پر دھرکے
8860
جاں اس کوچ جہانوں کیتا تتی کول نہ آہی
کیکرچھوڑ اسانوں ٹرُیا کس راہ ہویا راہی

لفظالی:
مکانوں = مکان دے سلسے وچ ، دُکان = کارخانہ ۔دنیا جیہڑی دُکانداری تے نفع نقصان نال بھری پئی اے، پران= ساہ ست۔ سکت، جان پران وسارے= جِند ساہ ولوّں بے نیاز ہو گئی ، ہگاڑی= اُگھاڑی ۔ کھولی ، تابوت = میت دفنان لئی بنایا گیا لکڑی دا صندوق ، منگھ = منگھورا۔ سوراخ ، مت=شایئد، ہتھوں = سگوں ، جھڑدی = ڈِگدی ، وٹ مارے = کس کے مارے، وٹ لئے = وٹالئے۔ بدلے وچ لے لے ، پٹ =ران ، پٹ رتے=سُرخ ریشم وانگوں ، پٹ پٹے=والاں دے پٹے پٹ کے ، سٹ سر=سر جھکاکے ، سڑی = جنونی ۔ سودائی ، چھِک کُنوں =کھچ دی پاروں ، پٹکے کھا=پٹخنی کھاکے سٹ کھا کے ، پھٹک = شےشہ ۔ بلور، لٹک = پریم عشق ، پھاٹک = پھٹ ۔ گھاؤ، والی = کن دی والی، کلنگ= کونج دا نرجو مادہ دے وراگ وچ کو کدا اے،دھن = چھ روپے قیمت دا خالص سونے دا سکہ، دھن مالا= دھن سکیاں دا ہار، چہا = چاہت ۔ حُب، وراگ= وچھوڑے د ا غم، تتی = بد نصیب،