ورقہ 475

8880
کتھے یار کتھے رَل خوشیاں کون تتی دا بیلی
خونی لہر ایہ شہر وسیندا دوزخ گرم حویلی
8881
تن کولھو دل بکھر میرا درد تساڈا تیلی
تتی تاواں لاء محمد پیڑی جان اکیلی
8882
کے کجھ حال اساڈا سیّو لد گیا چھڈ بناّ
لوُں لوُں گھاء فراق اوہدے دا کتنے سِیڑاں بنھّاں
8883
پکڑی جان عذاباں جیوں کر بیلنیاں منہ گنا
آکھن رہو نہ رہاں محمد صبر پیا بن بھنّا
8884
ایہو بھلی میرے حق ربا جاساں پاس سجن دے
درد بخار اندر دے پھولاں پھٹ دسالاں من دے
8885
کے کجھ اوس میرے سنگ کیتی ٹریا سٹ اکلیّ
دُکھ ابال نہ ٹِکن دیندا کیکر بہاں نچلیّ
8886
کیتا حکم چُہفان منگایا پے ڈولی اُٹھ وگیّ
جا کر قبر کلاوے لیوس وانگ سجن گل لگی
8887
چہرہ زرد مٹی پر ملیا رتو نیر چلائے
دلبر نوں آزار دلاں دے درداں نال سنائے
8888
کدی سرہاندی کدی پواندی چُمے خاک قبر دی
کوکاں تے فریاداں کر دی نامراد نہ مردی
8889
جیکر موت ہوئے ہتھ میرے بندی تُرت قبولے
سیف ملوکا حال تتی دا ویکھاں ہے کت رُولے
8890
کیوں منہ کج اساں تھیں بیٹھوں بات نہ پچھیں مُولے
اوہو بدیع جمال پیاری سر تیرے پر جُھولے
8891
تسیں زمیں وچ اوہلے ہوئے جیونکر بوند اسمانی
میں وچ مٹی گھٹے رُلدی ککھاں وانگ نمانی
8892
جس صورت دا وال تینوں سی لکھ جانی دے مُل دا
اوہو حسن پری دا شاہا خاک تیری وچ رُلدا
8893
جس کارن تدھ کارن کیتے جھلےّ دُکھ ہزاراں
جاں اوہ پھُل ارم دا لدھا آیاں عیش بہاراں
8894
شاخوں تروڑ گھٹے وچ سٹ کے آپ گیوں نس باغوں
کولا ہو گیا اس داغوں بدن مثال چراغوں
8895
سیف ملوک بندوق لگائی کوک نہیں ہُن کاری
غم میرا غم خوار نہ پُچھدا کون کرے غم خواری
8896
جلیا بلیا جیؤ تتی دا اگ لگی جیوں رُونواں
بھانبڑ بھڑک اٹھے بھڑکارے زمیں زمن تک دُھوواں
8897
لوہو بھریا مُکھ تتی دا یار ہوندا تد دھوندا
اج میرا ایہ درد وچھوڑا جو تکدا سو روندا
8898
گگن چڑھن دا راہ نہ کوئی ویہل نہ دیندی دھرتی
شالہ بھاء نہ پوے کسے دے جو سر میرے ورتی

لفظالی:
تتی=بد نصیب، بکھر= کولھو وچ پیڑیا جاون والا بی تل توریا سرہیوں وغیرہ ، تاواں لا=گرم کر کے،لد گیا چھڈ بنا = لاڑا چھڈ کے چلاگیا، سِیڑاں = ٹانکے تروپے لاواں ، رہو = صبر کر ۔ نہ بول ، بھناّ = نس بھج گیا ، دسالاں = ظاہر کراں ۔ دکھاواں ، نچلی ّ= پر سکون ۔چپ چاپ، سرہاندی= سر والے دا، پواندی= پیراں والے پاسے، بندی= کنیز ، تُرت= چھیتی، جھُولے= پکھے وانگوں ڈول رہی اے۔ پکھا جھل رہی اے، لکھ جانی = لکھاں جاناں ، کارن= واسطے ۔ لئی، کوک نہیں ہن کاری= چیکن کوکن دا کوئی فائدہ نہیں ، مثال چراغوں = دیوے وانگوں ، رُنواں = رُوں نوں ، بھڑکارے= شُعلے، زمن= سارا۔ جہان ۔ زمانہ ۔ یونیورس، گگن= اسمان، ویہل = ورل۔ا ندر سما جاون لئی تھوڑی جیہی گنجائش، بھاء پینا= بھاگاں وچ لکھیا جاونا، ورتی= بیتی ۔ واپری،