ورقہ 477

8918
روندی روندی نوں غش آئی ڈھہٹھی نال ہلاکی
نبضاں چھُٹ گیاں رنگ بھریاں چائی ساہ چلاکی
8919
خدمت گاراں نال شتابی محلاں وچ پُچائی
دتیوس جان سجن دے دردوں نیک گھڑی جدآئی
8920
آ خوشبو سنیہا دتا کھِڑے گلاب بُلاندے
بلبل مست چمن ول اُڈی درسن لین گلاں دے
8921
حسن سَمند حقان وچوں سی قطرہ صاف نورانی
ندی مجازی اندر آیا بن کے شکل زنانی
8922
باغ مجازی اندر آہی بوند سچی شبنم دی
سورج ویکھ ہوئی اُڈ اُچیّ رلی آندی جنم دی
8923
حق اپنے سنگ ملحق ہوئی جیوں بو وچ گلاباں
شیری شہد اندر جیوں رچے مستی وچ شراباں
8924
خویش قبیلے خِذمت گاراں پایا شور ککارا
اج بدیع جمال پری دا ہویا کوچ نقارہ
8925
جو سُندا سو ہنجوں بھردا ہر کوئی ہاہکامارے
عورت مرد مصر وچ رُنے شور ملک وچ سارے
8926
ہنجو نیر وگے پر نالے نالے آہیں نالے
اتھرواں جل پاء نہائے آہیں دُھکھن جالے
8927
شاہ پری دے دردوں ناریں زلفاں پٹ پٹ سٹن
سخت طمانچے منہ پر مارن چکیں باہاں کٹن
8928
جیونکر اوہ کریندی آہی سیف ملوکے کارن
تیویں ہون سیاپے اس دے درد تپایا آرن
8929
رون پٹن دے جاں ہو چکے غوغے کتنی واریں
رو رو غسل پری نوں دتا نیک اصیلاں ناریں
8930
جیونکر مینہ بہاری دھوندا روشن پھُل گلابی
تیویں بدن پری دا کیتا جوبن دات جنابی
8931
انگ گلابی تے رنگ کیسر رنگ عجائب بندا
سجرے پت چنبے دے وانگر بانا سبز کفن دا
8932
تہ بہ تہ پہنائے پردے کلیاں وانگ لپیٹی
چلی دوالے بند عشق دی بنھ کمر نوں پیٹی
8933
سیف ملوک شزادہ آہا دفن ہویا جس جائی
قبر اوہدی دے نال برابر اس دی گور بنائی
8934
چنگا گور جنازہ کر کے دفن پری نوں کیتا
عاشق تے معشوق محمد وصل پیالا پیتا
8935
ماتم بہت مصر وچ ہویا روندے مرد زنانی
کئی دہاڑے انّ نہ پکا خلق رہی حیرانی
8936
بند بزار رہے کوئی مدت کوئی نہ آوے جاوے
نہ دربار کچہری لگی ہر کوئی رووے ڈھاوے

لفظالی:
ڈھٹھی نال ہلاکی= مرگی دے دورے نال ڈِگ پئی، چائے ساہ چلاکی = ساہ نے اپنی چال تیز کر دتی، درسن = درشن ۔ دیدار، سمند حقان= حقانی سمندروچوں ، حقان = حق سچ ۔ حقیقت حق سچ دی طرف داری، ہاہکا مارے= ہؤکا۔بھرکے، ہنجو نیر= اتھرواں دا پانی، آہیں نالے= آہاں دیاں چھوٹیاں ندیاں ، آہیں تھکن جالے= آہاں دی تھکاوٹ ساڑ رہی اے، کارن = لئی ۔سوگ وچ ، آہرن = لوہار دی بھٹھی، اصیلاں = خاندانی۔ اصلے والیاں ۔ اُچے گھرانے دیاں ، ناریں = زنانیاں نے ، جوبن دات جنابی= حسن خدائی عطیہ ہوندا اے، پت= پتر ّ ، بانا= لباس، دوالے= بند۔دوال بند پیٹی بنھن والا مستعد ملازم ۔ ( کفن دی سلائی ویلے اک کمر بند پیٹی وی ہوندی اے)، جائی= تھاں تے، ان = اناج ، ڈھاوے= ڈھائیں مارے، شیریں=شیری دا مقامی تلفظ جویں موتی دا موتیں اے،