ورقہ 478

8937
سیف ملوک بدیع جمالے کر کر یاد لوکائی
آہیں ڈھاہیں بھر بھر روندی جیونہ رہندا جائی
8938
واہ وا بھاگ تنہاں دے جیہناں دلبر کول وسیرا
جیوندیاں بھی رہن اکٹھے مویاں ہووے اک ڈیرا
8939
واہ عاشق معشوق جیہناں دے ہوئے پار اتارے
جیوندیاں نت واہ دے وادھے مویاں بی قول نِہارے
8940
اِس پچھے اُس سفر کٹے سن اُس پچھے ایہ موئی
واہ پریت محمدبخشا دوہاں ولاں تھیں ہوئی
8941
ایس پچھے اُس شاہی چھڈی اوس پچھے اس اکھیں
خاکو رَلے محمدبخشا وال جیہناں دا لکھیں
8942
پاوے لاکھاں فیض اوہناں دے جان سمیت بدن دے
دیدے دلدے روشن ہوئے نال جمال سخن دے
8943
قطرہ عشق محبت والا پاون خیر جنابوں
پُر کر دیون ٹھوٹھا میرا خاصے شوق شرابوں
8944
دنیا تے دل لان نہ چنگا بھٹھ اس دی اشنائی
سبھ جگ چلن ہار ہمیشہ نہیں نباہو کائی
8945
جت ول ویکھو قید غماں دی کس خلاصی پائی
کرے خلاص محمد بخشا رحمت لطف خدائی
عاشقانہ طریقے نال زمانے دے ظلم دی شکایت
8946
باشک ناگ اسمان اساں پر غضبوں کنڈل مارے
آدمیاں نوں ڈنگن کارن چھجلی نِت کھِلارے
8947
کنڈل گھت کِیتا اس قیدی کس راہوں نس جائیے
ہر دم فکر اساڈے لگا کردا کھائیے کھائیے
8948
ڈنگ اس دے تھیں کوئی نہ خالی ہر اک نوں بِس دہائی
سینکڑیاں وچ اکس کسے پر، رحم نہیں اس بھائی
8949
ظلم اس دے تھیں کوئی نہ چھُٹا ہر اک نوں پھٹ کیتوس
زخم گھنے تے مرہم نہ کوئی نہ بنھ پٹی سِیتوس
8950
ویری دغا کماون کارن کھیڈاں کر کر دَسدا
سوگ دَسےّ بَن نیلا دینہیں راتیں کھِڑ کھِڑ ہَسدا
8951
راتیں بنے بریڈا چنبا شیر دینہاں اِک رنگا
شیر بریڈے دے منہ آیوں اے سنسار کرنگا
8952
دم دم فکر غماں وچ مرئیے کر خفگی دل تنگوں
کیکر ہوگ بچا اساڈا ظالم شیر پلنگوں

لفظالی:
جیوجائی نہ رہندا= دل ٹکانے نہیں سی رہندا ۔اک وار ساریاں دے دل ای ہل جاندے سن،دلاں = طرفاں ، اوس پچھے اس اکھیں = سیفل پچھے شاہ پری نے اپنیاں اکھاں رو رو کے انھیاں کر لیاں سن (دیدے دلبر ویکھن کارن بن دلبر کیوں رکھاں) ، پار اتارے ہوگئے = دونویں اگلے کنڈھے جا اپڑے ،بھٹھ اس دی اشنائی = دنیا کی دوستی بھاڑ میں جائے ہمیں اس کی ضرورت نہیں ، نباہو= نباہنے والا، کرے خلاص۔۔۔۔۔۔= خدادی رحمت تے مہربانی ای سانوں سارے غماں دی قید وچوں کڈھ سکدی اے، کنڈل مارے= ولاویں کھادے،فکر اساڈے = ساڈے مگروں ساڈے ویر دی سوچ وچ ، چھجلی = چھج وانگوں چوڑی پھن ،بِس دھائی = زہر اندر دھسی جا رہیا اے، چھُٹا = بچیا۔ مستثنیٰ ہویا، پھٹ کِیتوس= اوہنے پھٹڑ کیتا، پلنگوں =چیتے نوں ، راتیں کھِڑ کھِڑ ہسدا= رات نوں ستارے چمکدے نیں ایسے نوں ای ہسنا آکھیا گیا اے، بریڈا= چیتا، سنسار= زمانے دے لوک، خفگی= گھٹن غم غصے دی حالت،نِہارنا= دیکھنا۔ مدنظر رکھنا،چنبا=ڈب کھڑبا ۔ رنگ برنگا،