ورقہ 480

8972
سر منہ پرنے ڈھہندے وتدے پَتّر واؤ اُڈارے
ہو رہے بے تاب بے چارے سُکےّ منہ فوارے
8973
وقت بہاراں اوہ غمناکی وقت خزاں ایہ رُولا
کدوں ہووے گا دنیا اُتےّ سکھ میرے مقبولا
8974
جگت زمانہ دُکھیں بھریا روون دھوون آہیں
جے سکھ ہوگ کِتے ول تاں بی آدمیاں نوں ناہیں
8975
ہر دم کوچ نقارہ سرتے گھُردا پیا سنیندا
ساتھی ٹردے جاندے دسدے کیونکر سُکھ وسیندا
8976
کالے اک اک وچھڑ چلے گورے خط لیائے
بنّھوں بھار تیار سفر دا کوچ سُنیہے آئے
8977
اُڑ کے ٹُرن لگوں جس ویلے موت سلام پُچائے
لے سلام سنائہ محمد کون امن پھر پائے
8978
اڑیا اجے نہیں اُڑ ٹریوں کے ہویا اُڑ ٹریا
بدلے نوں جھٹ کٹن دیہ کھاں زوریں جھُل نہ پُریا
8979
مشرق دی جد مغرب سٹی کس کم تیرا جھُریا
کہے محمد نہ ہو غافل سمجھ مناں توں بُریا
8980
منزل مارن والے گھوڑے لنگ لنگیں ہُن چلدے
ریہنگن داؤ بناؤ جس نوں جھولے نیں اُت ول دے
8981
وَل کھڑسن ول ہوسیں تاہییںول کڈھَسیں وَل دل دے
کاغذیاں تھیں کد محمد مِٹدے لیکھ اوّل دے
8982
قوت باہ گئی کر بھُگا گُتگا سٹ نہ جھلدا
جاں چوہ ہارے نال چھوہارے کچرک رہسیں چلدا
8983
ڈھلا ہویا وضو دا قبضہ وائیوں پھَڑ پھَڑ ہلدا
بادی تے بواسیر محمد کرن بہانہ گل دا
8984
معدہ سرد غذا نہ ساڑے دست اپھارے پیڑاں
ککھاں دی اگ کچرک دیسیں سونف جوین ہریڑاں
8985
کھنگ لگی کف آئی جانوں چڑھدی لہر اجل دی
تم ساہوں تم ساہ ہوئے نیں ترکھ کرے جند چلدی
8986
اک پل غم بغیر نہ لنگھدا بلغم زورا پایا
آپ ہتھیں مَنہ لٹھ لیوئی عاصا موت ٹکایا
8987
ہتھاں نوں تھر کنبا لگا جھولا تُدھ بنایا
ایہ جھولا او جھلیا کہندا چھڈ دے مال پرایا
8988
بھارا جل دے لک دُکھایا تاں تدھ چُک بنائی
چُک لئی اوہ قوت اس نے آہی جس ٹکائی
8989
موتیں جڑے برابر چٹے دند ہوئے رنگ پیلے
کِسراں وتھاں چھیک پئے نی دین لگوں وچ تیلے
8990
تدھ جاتا کوئی کیڑا لگا دند نزولوں ہلدا
کہو کیڑا کت پاسوں آیا گھِن نزول اُت ول دا

لفظالی:
وتدے= پھردے، رُولا= حال طریقہ، گُھردا= وجدا، گورے= دھولے چٹے وال، ڈھہندے= ڈِگدے ، خط= موت دا سمن، اُڑٹرنا= طبیعت وچ عاجزی آنا، بدّلے =بدّل۔(عارضی قیام والی شے جنہوں پُرے دی ہوا اڑا کے لے جا سکدی اے) ، مشرق دی مغرب سٹنا= حواس قائم نہ رہنا،جُھرنا= افسوس کرنا، گھوڑے= لتاں ٹنگاں، رینگن واؤ= لک یا چولے دی ریح بادی دی پیڑ، جھولے نیں اتول دے= اوس پاسے دی ہوا آ رہی اے، ول کھڑسن= (١) تینوں گھیر کے لے جاون گے (٢) ول دا مقام جتھے جایاں ولی دی دعا نال مٹی ملن نال ربہنگن دی پیڑ ٹھیک ہو ندی اے ، بھُگا= گھُن کھادا، گُتکا= مرد دا بھوگ کرن والالنگ، وایوں = بادی پاروں ،کاغذی=کاغذ دا پرزا جیہڑا غلط چھپے لفظ اُتے لا دتا جاندا اے ۔(٢) جعلی تعویذ لِکھ لِکھ کے پیسے بٹورن والے کاغذ فروش لوک، چوہ= عورت کول جاون دے قابل قدرتی گرمی۔ حرارت غریزی، وضو دا قبضہ ڈھلا ہونا= بار بار ہوا سرنا، سونف جوین ہریڑاں= معدے دی طاقت لئی عارضی دوائیاں جیہڑیاں ککھاں دی اگ وانگوں عارضی گرمی دیندیاں نیں ،ہتھیں مُنہ= ہتھاں وچ ، تدھ بنائی= توں غلطی نال سمجھی اے ، چُک = لک وچ پیا ول،