ورقہ 481

8991
نکوں پانی پئی مدھانی رڑکیں سنجھ سویرے
پانی رِڑک وہانی ایویں کہہ کے حاصل تیرے
8992
ٹھنڈ زکام بناویں مُوہوں کام ہویا ہُن پورا
اس شوروں پت رہندی ناہیں کے لوڑیں پت شورا
8993
ٹھنڈا ہویا بزار عمر دا ایہو دُھند رنجورا
اجے محمد حرص ہوایوں ٹھنڈ نہ پئی آ بھورا
8994
چشماں چشمہ جل دا ہویاں اٹھے پہر اُنباہو
ٹھنڈیاں باراں تھیں چھُپ نٹھے بار چرندے آہو
8995
جس جس پاسوں آن رلے سن ہوئے تتے ول راہو
وچھڑ چلے سبھ ساتھ محمد کوئی نہ نال نباہو
8996
دُھند غبار سنسار دسیوے ہار ڈھٹھی جد ہرنی
سُرمچواں دے تیر چلاؤ سرمے ول نہ کرنی
8997
ڈُلھّی شیشی صاف نظر دی گھت بھرنی کے بھرنی
عین گئی پھر کے محمد عینک نک پر دھرنی
8998
ہک ہک کر کے لیندا جاندا جس دتیاں ایہ چیزاں
رل بیٹھن دی گھڑی غنیمت پوگ فراق عزیزاں
8999
جتنے ساری دنیا اندر پت درختاں اُتے
اتنے صورت سوہنی والے خاک اندر رل سُتے
9000
جتنے پُھل جگت پر سارے سوُہے چٹے پیلے
ہر ہر رنگوں دین نشانی ہو ہو گئے رنگیلے
9001
سبزے نالوں وافر گذرے سبز پوشاکاں والے
لالے تے گلناروں وافر رنگ جِنھاں گل لالے
9002
چٹے پھُل جگت پر جتنے دِسدے وانگ ہشناکاں
ودھ اس تھیں ہو گزرے کتنے جِنھاں سفید پوشاکاں
9003
ہوئے ودھیک گلاباں کولوں سوہنے مُکھ گلابی
زرد پُھلاں تھیں بہت محمد عاشق جگر کبابی
9004
پنکھی خوش آواز ہزاراں جو باغاں وچ بولن
شاعر گھنے اُنھاں تھیں ہوئے سُخن جواہر تولن
9005
آپو اپنے بول آوازے کوئی نہ کسے جیسا
ہکنا دا مُل مُہراں موتیں ہکناں دھیلا پیسا
9006
جیسا جیسا دان کسے نوُں دتا بخشنہارے
سوئیو ورتن ہوندا بھائی دیندا کون اُدھاراے
9007
جو جو چیز ہٹی وچ ہوسی سو کڈھنی بنجارے
ہک بنجارے موتیں ویچن ہک منکے کچکارے
9008
سِر وَرتے جس حال سنائے لعل جواہر اوہا
جس اسْمتّر سنی سُنائی مُل اوہناں دا لوہا
9009
حالاں والے گئے اگیرے کر کر سحر حلالاں
جیہے جیہے رب دتے گھوڑے دس گئے سبھ چالاں

لفظالی:
سنجھ= شام ، پئی مدھانی = نک دے فضلے سینڈھ ول اشارہ اے، پانی رڑکنا= فضول بے نتیجہ کم کرنا ، کام پورا ہویا= شہوت قوت باہ مک گئی ، اس شوروں= کام مکن دا رولا پان وچ کوئی عزت نہیں ، وہانی= عمر بیتی،کے لوڑاں پت شورا= بہادر مرد دی مردانگی تے عزت کویں لبھنا ایں ، دُھند=دھُن، تِتے ول = اوس پاسے، انبا ہو= جوش جذبے نال ابلن والیاں ، بار= قدرتی جنگل غیر آباد جوہ، راہو = راہی ۔ مسافر ، ہار ڈھٹھی= ہار کے ڈگ پئی، بھرنی = اکھان وچ پان والی دوائی دی چوہنڈھی ، عین = اکھ ۔ بصارت ۔ نظر، نباہو=توڑ ساتھ نباہن والا، کے= کیوں ۔ کیہ بے فائدہ، پوگ=پوے گا، ہُشناک =گورے رنگ والے شہوت پرست محبوب، مُہر= اشرفی توں وڈا سونے دا سکہ ، آہو= ہرن ( اکھاں جو کدے بار و چ چرن والے ہرن دیاں سن) کچکارے= کچ دے جھوٹھے منکے کچکرے، آوازے= آواز۔ خیال نظریہ ، سحر حلال = عام جادو حرام اے پر صاحب حال لوک حلال جادو پا کے دنیا توں چلے گئے نیں ، اسمتر= اساں ماتر ۔ ساڈے ورگے ہماتڑ سنسار = ایہہ سارا جگت ، دیندا کون اُدھار اے= پہلوں نقد لے کے ای دیندے نیں ،