ورقہ 487

9103
کھریاں دے لڑ لگا میں بھی کھوٹا آپ جہانوں
شالہ کھوٹ میرے نوں کجّن دائم شرم ایہناں نوں
9104
پردہ پوشی کم فقر دا کرسن اللہ بھاوے
سدا امید محمدبخشا زور دلے وچ پاوے
9105
آسا وند نہ خالی جاون سخیاں دے درباروں
ایتھے اوتھے دوہیں جہانیں کرم منگاں سرکاروں
9106
کِسے کِسے تھیں کِسے کِسے تھیں کسے خضر الیاسوں
شعر کلام سخن دی بخشش مینوں مرشد پاسوں
9107
ہکو سخن نہ ہور تمامی جو نعمت میں پائی
اوسے مرد سچے دا صدقہ اپنی نہیں کمائی
9108
خسخس جتنا قدر نہ میرا اس نوں سبھ وڈیایاں
میں گلیاں دا روڑا کوُڑا محل چڑھایا سائنیاں
9109
سائنیا! رب وڈیائیاں دیوی جس میرا ہتھ پھڑیا
عاجز رُڑھدا ڈُبدا جاندا بیڑی تیری چڑھیا
9110
اوس بیڑی دا پور ہمیشہ شالہ صحیح سلامت
دنیا اتے موجاں مانے سُکھی روز قیامت
9111
ہر دم رہے ملاح سرے تے رکھے ہر گردابوں
پار چڑھاوے پور اساڈا بچیےئ سبھ عذابوں
9112
سر ساڈے پر ہووے ہمیشہ مہر اوہدی دا سایہ
پاون سبھ پیارے اس دے یمُن برکت پایہ

کتاب دا خاتمہ تے عقل شعور والے راویاں دا بیان

9113
سیف ملوک بدیع جمالے کامل عشق کمایا
کیتا جوش طبیعت میں بی قصہّ جوڑ سنایا
9114
چوہاں گُٹھاں تھیں پریاں سدیاں ہر پاسے گھل عرضی
چارے دارو واری آیاں جیوں جیوں لگی مرضی
9115
معتبراں اخباراں دسن ہر دانے پردھانے
کدھروں اکو گل سناون کدھروں ہور نشانے
9116
بُہتی گل لکھائی اس نے جو سی اوّل آئی
اس دی دسی کوئی نہ چھڈی بیتاں اندر پائی
9117
ہوروں ہور سناون لگیاں جیؤں جیؤں پچھوں آیاں
جے سبھ گلاں جوڑ سناواں قصے پین خطایاں
9118
جو جو بندی پھبدی آہی اوہ روایت پائی
تھگڑی ٹاکی جوڑ جُٹا کر جُلیّ راس بنائی

لفظالی:
لڑلگا= بیعت ہویا۔ سلسلے وچ شامل ہویا، اللہ بھاوے = ان شا اللہ ، آساوند= اُمیدوار، الیاسوں = حضرت الیاس دے ذریعے ، رُوڑا= گوہے گند دا ڈھیر، ہتھ پھڑیا= ویلے سر دستگیری تے امداد کیتی، شالہ= شا اللہ اللہ کرے ۔ اللہ چاہے، پایہ= درجہ مقام ، رکھے = بچائے، پار چڑھاوے =پارلے کنڈھے تائیں اپڑائے، یُمن = برکت ، گرداب=گھمن گھیری، عشق کمایا= عشق دے سب تقاضے پورے کیتے، اخباراں= تاریخی کتاباں ۔ معتبر روائتاں ، دانے پردھانے= دانا تے پردھان لوک، نشانے= پوائنٹ نقطے، خطایاں = غلطیاں ،جُٹا کرنا= دوہاں دا اک کرنا، راس بنائی= درست کر کے سودھ دتی،