ورقہ 488

9119
ایسی رفو کیتی ہر سیون کوئی معلوم نہ کرسی
ہکو پوت دسے گا بھائی جے کوئی اگے دھرسی
9120
مختلفاں جو نظری آیاں چھڈ دتیاں کئی گلاں
ہک لِکھاں تے دوجی بھجدی دسو کت ول چلاّں
9121
سیف ملوکے دے ننہالے بُہتے کہن یمن وچ
ہک راوی قحطان بتاندا کس دی پائیے من وچ
9122
پہلے یار بدخشاں دسی اوہو کاغذ لائی
اوہ بھناں ہن ہور بناواں اس وچ کے وڈیائی
9123
مختلفاں اس روشے گلاں کوئی ضعیف روایت
بھجدی ناہیں قوی ضعیفوں کیتا فکر نہایت
9124
پریاں چار مراد کتاباں کیوں بھُلاوا پاواں
نہیں تاں حکم میرا کد اتنا پریاں سد بہاواں
9125
تھوڑی بات کتاباں اندر بہتی آپ بنائی
کیکر آپ بناوے عاجز سبھو دات خدائی
9126
ظاہر دل بگلائی کارن قصہ عشق مجازوں
اندر خانے خبراں دیسی فقراواں دے رازوں
9127
رمزاں نال پُرتا سارا چاہین سمجھن ہارے
ہمت اگے مشکل آساں ہمت مرد نہ ہارے
9128
اسے ہکسے مصرعے اندر غرض قصّے دی ساری
جو ڈھونڈے سو پاوے بھائی مفت نہیں پر یاری

کتاب دے خاتمے تے چند گلاں تے مناجات

9129
شکر الحمد خداوند تائیں اندر ایس زمانے
تمّ ہویا ایہ قصہّ روشن ورتی وچ جہانے
9130
قافیاں دے فکر اندر سی دل چنتا وچ جھُردا
کم لما تے پتہ نہ کوئی موت نقارہ گھُردا
9131
تاول تھیں کم سادہ کیتا چھڈیاں بہت رسوُماں
چِت اُداس جمعیت تھوڑی نالے کول ہجوماں
9132
والی والی چار دوالی عالی چڑھدی آہی
اوہ کمتالی فکر اندیشہ نالے سی کجھ واہی
9133
وزن برابر بیت بنائے کنڈے چاڑھ عقل دے
ردے ردیفاں قافیاں سنگ جاسن ملدے رلدے
9134
صنعت بھی کجھ تھوڑی بہتی ہوسی نال طریقاں
لذت سوز نہیں وس میرے صاحب نوں توفیقاں

لفظالی:
پوت= خالص ریشم نال کڈھیاہویا کپڑا۔ خالص ریشمی کپڑا جہدے وچ اکو کوالٹی دا ریشمی دھاگا ورتیا گیا ہووے، بھجدی = کٹّی جاندی۔ منسوخ ، بھناں=توڑدیاں ۔ منسوخ کراں ، کاغذ لائی = لکھی، اس روشے= ایس طریقے دیاں ، دل بگلائی کرنا=دل ورچانا، دات= عطیہ ، کارن= واسطے، پرُتّا= پِرویا ہویا، چاہن = پسندکرد ے نیں ، پر = مگر ۔ لیکن ، تاول = چھیتی ۔ کالھی ،گھُردا= وجدا، رسوماں = ناجائز تکلفات، چِت= دل ، جمعیت=دلی سکون ، والی=مراد حضرت شیر بگا جنہاں دی چار دیواری بناون وچ میاں صاحب رُجھے رہے، عالی = اُچی ۔ اُچے مرتبے والی، کمتالی= رجھیواں ۔ کم فرصتی، واہی= کاشتکاری دا کم ، کنڈا= کانٹا قیمتی چیزاں تولن والا چھوٹا ترازو، ردا= کندھ دیاں اٹاں دی اک سطر دی سدھا ئی پدھرائی۔ شعر دے ہر مصرعے وچ وی اوہوای روا رکھنا پیندا اے ، صاحب = مالک ۔ اللہ تعالیٰ، طریقاں = شاعری دے اصولاں ،