ورقہ 489

9135
کاٹھی گھوڑے رب دے بخشے آہا اک طویلہ
وارو واری ڈاک چلاواں چاڑھ گھلاں ہک چیلا
9136
ہک چیلا کشمیر بہایا کردا ہک سواری
پھیرے اُپر پھیرا پاوے حکم منے سرکاری
9137
پل پل اندر ہندوستانوں جاندا سی کشمیرے
گھوڑے تھک ترُٹے بہتے لیٹ رہے ہو دھیرے
9138
ہرن ہیرا کستورا مینوں پیر استاد پھڑایا
سوہنی چال چلاکی والا لبھدا پھیر کھڑایا
9139
پانی پیو تتاروں نکلے جا کشمیرے چڑھدا
خوشبوئیں تے کھوج کھلارے مغز معطر کردا
9140
اوہ بی رج رہیا اس چریوں چین اندر ونج سویا
جاگ اُٹھے گا اللہ بھاوے حکم جدوں پھر ہویا
9141
منہ پر پلاّ لیا دواتے چھٹی ورق پرتوں
وانگ گُلاں ہک کاٹھی ہوسی اندر بھریا پتوں
9142
شالہ وانگ گلاں دے اس وچ سدا رہے خوشبوئی
سچیاں مرداں دی سنگ برکت عیب نہ لگوس کوئی
9143
ناز نیاز تے سفر عاشق دا ایس قصےّ وچ آیا
سفر العشق محمدبخشا نام دلیلوں پایا
9144
واہ وا باغ ارم دا بنیا دیوس رب بہاراں
ٹھنڈی تتی واء نہ لگوس رونق رہے ہزاراں
9145
ہر دستان بغیچہ کِھڑیا دستے دئے گُلاں دے
جیوں شاخاں وچ شاخاں گُندیاں تیوں معنے دکھلاندے
9146
خط کالا تے کاغذ چٹا ائیوں دکھلائی دیندا
چاننیاں وچ چھاؤں چمن دی چمکاں نور مریندا
9147
چشمے دار حرف وچ جیہڑے معنیوں چشمے وگدے
لیکاں نہراں صاف محمد پانی پکھے لگدے
9148
اس کٹھے پر کٹھے ہوکے آن لتھے جو راہی
نہاتے دھوتے خوشئیں ہوئے میل غماں دی لاہی
9149
جس ویلے دل لہریں آوے کرونگاہ شرم دی
میں عاجز ترہائے کارن منگو بوند کرم دی
9150
جاں باغوں پھُل چُن چُن سُنگھو کلغی ہار بناؤ
جس لایا ایہ باغ اوہنوں بی یاد دِلوں فرماؤ
9151
اس باغے دے سیر تسانوں جم جم سدا سُکھاون
دیو دُعا اسانوں دلبر خوش ہو مُکھ وکھاون
9152
جے رب سچے رحمت کیتی رہسی باغ اُجالا
مرکے خاک ہوئے گا عاجز باغ بناون والا
9153
تسیں پھرو نت باغاں اندر خوشیاں عیش مرادوں
خاک ہویاں پر رحمت بھیجو دور نہ سُٹو یادوں

لفظالی:
دھیرا = ڈِھلا ۔مٹھا، ہیرا ہرن = ٹ ک تفصیلاں ، لبھدا پھیر کھڑایا= گواچی شے نوں دوبارہ لبھ لیاوندا سی ، چریوں = چرے توں ، چرا = چرن جوگاگھاہ بوٹ چراند۔ چراگاہ، پھڑایا= قابو کرن وچ مدد کیتی، تتاروں = ملک تتارتوں ، کھوج کھلارنا= اپنا کھوج کھُرا اپنے پچھے خوشبو راہیں کھلاری جانا، اللہ بھاوے= ان شاء اللہ، منہ سر پلاّ۔۔۔۔۔۔= دوات منہ تے پلا لے کے سوں گئی اے ،ہر دستان= زعفران زار۔کیسر دی پیلی ، دستے=(١) مُٹھاں (٢)گُلدستے، پتوں = پتراں نال، ہک کاٹھی= بوٹے دا قالب ۔ فریم شکل، کاٹھی= لکڑی ، سنگ دی برکت = سچے مرداں نال صحبت رکھن دی برکت، دلیلوں = اندروںاُٹھے خیال توں ، ٹھنڈی تتی وا۔۔۔۔۔۔= ناموافق موسماں دااثر سیاسی تبدیلیاں دا اثر، ہزاراں = بلبلاں ، چشمے دا ر حرف= دو اکھاں (ھ )دی ورتوں والے حرف،پکھا= کھیت دے اُچے نیویں ہوون دی وجہ توں کھیت دو حصیاں وچہ ونڈیاجاندا اے پانی لاون لگیان پہلاں اک حصہ بھریا جاندا اے پھیر دوجا حصہ ایہہ دونوےں حصے پکھے اکھواندے نیں ، کٹھا = پہاڑی چشمے وچوں ڈگدے پانی دی وڈی دھار۔ آبشار ۔جھرناFall، چین = ہیرے ہرن دا اصلی وطن تاتار