ورقہ 491

9173
جیہناں خرچ دلیری تنہاں کڈھ کڈھ دیندے آٹا
خالی ہتھ حیران بے چارہ بہے ہیٹھاں سُٹ گاٹا
9174
شرم پوے گھر والے تائیں اس اگے بھی دھردا
میں بھی خالی ہتھ مسافر تکیہ تیرے گھر دا
9175
ہک کوئی شخص شرابی ہویا مسجد اندر آیا
رب سچے ول عرضاں کردا بخش بہشت خدایا
9176
مُلاں پکڑ کھدیڑن لگا باہر جا پلیتا
نیک بہشتی بنیا لوڑیں کے عمل تدھ کیتا
9177
مستانے فرمایا حضرت جاں رحمت ول تکاں
یاد گناہ نہ رہندا کوئی نہ مُونہوں کہہ سکاّں
9178
رحمت تھیں نامید نہ ہوساں نال گُناہاں بھریا
بُریائیاں دی حد نہ رکھی بھلا نہیں کُجھ سریا
9179
نسّن چھپّن کتے نہ ہوندا سر منہ اگے دھریا
قہر کریں تاں کوئی نہ چارہ رحم کریں تاں تریا
9180
اَن ہِلیاں نوں تدھ ہِلایا دے دے وافر چیزاں
نام حبیب سچےّ دے پچھے رکھیں وانگ عزیزاں
9181
قدر اپنے تھیں باہری منگی گل وڈی مُنہ نِکاّ
گِن گِن بہت سناواں کاہنوں لکھاں دی ایہہ ہکاّ
9182
آتش بخش محبت والی ساڑے غیر بنبُولاں
پیرا شاہ قلندر اگے ہواں اندر مقبولاں
9183
ماپے تے استاد مربیّ میں پر حق جیہناں دے
رحمت بخشش مہر اللہ دی ہوے حق تنہاں دے
9184
ہوئے نصیب نبی دا کلمہ دین قبول محمد
لَا اِلٰہَ اِلَّا اللّٰہُ سچ رسول محمد

تَمّ الکَلَام بنَام سَیَّدِالْانام عَلَیہِ اَفْضَلَ الصَّلٰوٰۃ وَ السَّلَام
وَعَلیٰ اٰلِہ وَاولَادِہ وَ اَصْحَابِہ وَاَھْلِ بَیْتِہ وَسَلَّمَ
9185
اَشْھَدُ اَنْ لَّآ اِِلٰہَ اِلّاَ اللّٰہُ وَحْدَہ' باجھ شریکوں
وَ اَشْھَدُ اَنَّ بنی محمَّد پیغمبر نزدیکوں
وَ صَلَّی اللّٰہ ُ تَعَالٰی عَلٰی حَبِیْبِ خَیْرِ خَلْقِہ مُحَمَّدٍ وَّآلِہ وَاَصْحَابِہ وَاَوْلَادِہ وَذُرِّیَّاتِہ وَمُرْشَدَیْنِ وَسَلَّمَ ٥

لفظالی:
جیہناں خرچ= جیہناں پلے خرچ ہے دے اوہناں نوں دلیری اے ، گاٹا= گردن ، تکیہ = سہارا۔اُمید، کھدیڑن = کھچ دھر وہ کے باہر چِک کڈھن ، بھلا نہیں کجھ سریا= کسے نیکی دی توفیق نہیں ہوئی، تریا= پار لنگھیا۔ قبول ہویا، ان ہلے = جینہاں نوں کوئی عاد ت نہ ہووے، ہلایا= عادت گیج پائی، سر مُنہ اگے دھریا= جرات کر کے پیش ہوگیاں ، غیر بنبولاں = دوئی دے ککر کنڈے، مقبولاں اندر= منظور نظر بندیاں وچ، مربی= سر پرست پالنہار، دین قبول محمد= حضرت محمد دا دین قبول ہووے،