ورقہ 28

484
جھلن بھار ملامت والے عشقے دے متوارے
بھُکھا اُٹھ ہووے مستانہ بھار اُٹھاوے بھارے
485
حال اوہناں دا کس نوں معلم پھر دے آپ چھپایا
دل وچ سوز پتنگاں والا چہرہ شمع بنایا
486
باہروں دِسن میلے کالے اندر آب حیاتی
اوٹھ سُکے ترہایاں وانگر جان ندی وچ نہاتی
487
شہر اجاڑ ڈھونڈیندے وتدے دلبریار بغل وچ
گُنگے ڈورے کن زبانوں معنی سب عقل وچ
488
رات دینہاں گل لایا جانی ہک دم جدا نہ ہوندے
عاشق رجن نہیں محمد بھر بھر ہنجوں روندے
489
جنھاں عشق بندے دا لگا صبر ارام نہتِنہاں
سُتےّ بیٹھے اُت وَل ویکھن لُٹ کھڑے سن جنھاں
490
ایسا صِدق لیاون اس تے سچے نال دھیانے
اس بِن باغ بزار نہ بھاون لاون اگ جہانے
491
ہور کسے دی چاہ نہ رہندی سٹن سبھ اشنایاں
ماؤ پیو دا لنگ اُتارن لج لگاون بھایاں
492
اکھیں پائے کر کن ناہیں نیہوں جنہاندے لائے
اکھ میٹو تاں دل وچ وسدے لوں لوں وچ سمائے
493
شرم حیا نہ رہے کسے دا جھلن بدی خواری
دلبر باجھوں صبر نہ کر دے جنھاں لگائی یاری
494
جے اوہ جان پیاری منگے تُرت تلی پر دھردے
سِر لوڑے تاں سہل پچھانن رتی عذر نہ کر دے
495
اس ہوائے حرص ہواؤں ایسا ہے چِت مُسدا
جنھاں عشق حقیقی لایا کرو تعجب اُس دا
496
حالاں اندر کرو نہ حُجت بھلی نصیحت بھائی
حال محباں دا رب معلم ہور کے جانے کائی
497
ہر دم ذکر سجن دے اندر کُل جہان بھلاون
دل جانی دے عشقے کولوں اپنی جان رُلاون
498
ہک دلبر نوں دل وچ رکھن سبھ خلقت تھیں نسنّ
ویدن وید نہ جانن مُولے کہو کے دارو دسنّ
499
کن آواز پوے ہر ویلے پہلے قول الستوں
قَالُوْ بَلیٰ کو کیندے بھائی اوسے ذوقوں مستوں
500
وچوں آتش باہروں خاکی دِسدے حالوں خستوں
جے ہک نعرہ کرن محمد ڈَھین پہاڑ شکستوں
501
جے ہِک آہ درد دی مارن ہوندا ملک ویرانی
کوہ قافاں دے سبزے سڑدے ندئیں رہے نہ پانی
502
واؤ وانگ پھرن سبھ مُلکیں ہر گز نظر نہ آون
چپ رہن کستوری وانگوں پھر خوشبو دھماون

لفظالی:
متوارے = متوالے ۔ مدھ والے ۔اوٹھ = ہوٹھ۔بُل ۔جان = روح ۔وتدے = پھردے ۔لنگ اُتارنا = عزت پردہ لاہ دینا ۔کرکن = رڑکن ۔ تُرت=جلدی ۔اس ہوائے = مجازی خواہش وچ ۔حرص ہواؤں = جنسی خواہش توں ۔چِت مُسدا اے = دل لُٹیا جاندا اے۔ خواہشاں توں خالی ہوجاندا اے ۔حالاں اندر = صاحب حال لوکاں نال فضول بحث نہ کرو ۔ویدن = روگ۔ مرض ۔وید = حکیم طبیب ۔کن آواز = اوہناں دے کناں وچ رب دی اَلَسْتُ بربّکُمْ والی آواز ہر ویلے پیندی رہندی اے تے اوہ مستی نال اوہدے جواب وچ بلیٰ (ہاں) اآکھدے رہندے نیں ۔ڈھہن پہاڑ شکستوں=پہاڑ ٹٹ کے ڈگ پین ۔پھر = پھر پھر کے ۔دھماون = نشرکرن ۔سبزے = ہریاول ۔