ورقہ 4

52
نفر غلام کسے دا ہووے خدمت اندر ڈِھلا
خاوند نوں کد چنگا لگدا جھڑکے کر کر گِلّا
53
میر وزیر مصاحب شاہ دے حکموں باہر ہوون
شاہ کھدیڑے غصہ کر کے ہور بھی نوکر روون
54
واہ وا صاحب بخشنہارا تک تک ایڈ گناہاں
عزت رزق نہ کھسّے ساڈا دیندا پھیر پناہاں
55
دوئے جہان اسماناں زمیاں جو وافر بے اوڑے
وچ سمندر علم اوہدے دے ہِک قطرے تھیں تھوڑے
56
کھانے پاء بہائیوس چوکی ڈاہ زمیں دا پّلا
سجن دشمن چنگے مندے دیندا نہ دھرکلّا
57
جے اوہ قہر کماون لگدا کون کوئی جو چُھٹدا
رحمت اس دی جگ و سائے ہر ہک نعمت لُٹدا
58
بندگی دی پرواہ نہ اس نوں گھاٹا نہیں گناہوں
زُہد عبادت تاہییں ہوندے جاں گھلے درگاہوں
59
سدا سلامت راج اوسے دا اس در سبھ سلامی
آدم جن ملائک ہر شے جِیا جُون تمامی
60
مان کریندیاں مان تروڑے مسکینا ں دا ساتھی
کوہ قافاں وچ روزی دیندا سیمر غاں نوں ہاتھی
61
لطف کریندا کرم کنندہ ہر دے کام سنوارے
سبھ خلقت دا راکھا اوہو بھیت پچھانے سارے
62
سبھ وڈیائی اس نوں لائق بے پرواہ ہمیشہ
ہکناں تاج سعادت دیندا ہکناں بد اندیشہ
63
عیب میرے پر پلّا دیندا ہنر کریندا ظاہر
جدوں کرم دا واڑا کر دا کوئی نہ رہندا باہر
64
ہر عاجز پر رحمت کردا کرے قبول دعائیں
بن منگے لکھ دان دوائے محرم دل دا سائیں
65
ہر کوئی محتاج اُسے دا منگن ہارا در دا
ہر گز کیتی اس دی اُتے انگل کوئی نہ دھردا
66
دائم نیکو کاری کردا نیکی اس نوں بھاوے
بدیاں بھی پھر بخش گزر دا جاں رحمت پر آوے
67
سورج تارے اُٹھ قطارے مشرق مغرب جاندے
خاک زمیں دی ثابت رکھدا پانی تے تھر باندھے
68
دھرتی پوند ڈُلاندی آہی ایدھر اودھر ہو کے
حکمت نال لگائیوس مُحکم کوہ قافاں دے کوکے
69
قطرے ہک منی دے تائیں کے کجھ جو بن دیندا
پانی اُتے صورت لکھے حکمت عجب کریندا
70
اس صورت وچ سیرت پاوے اہل بصیرت تکدے
انھّے لوک اسمتر بھائی قدر پچھان نہ سکدے

لفظالی:
نفر = نوکر چاکر ۔خاوند= مالک، پلّادینا = ستّاری کرنا ،کھدیڑنا = چِک کڈھنا ۔محکم = پکا ،بے اوڑے = بے اوڑکے بے حد ۔چوکی بہانا = قطاراں وچ آمنے سامنے بہاکے کھوان لئی بٹھانا ۔ پلّاڈاہنا = دستر خوان بچھانا ۔دھر کلادینا = زبردستی کرکے چک کڈھنا ۔درگاہوں = اپنی جناب وچوں ۔پوند = پہلے جیاجُون = ہرقسم دی مخلوق ۔اسمتر = اساں ماتر۔ ہما تر ۔سیمرغ ہاتھی = کوہ قاف وچ پایا جاون والا خیالی پرندہ۔ ایرانی ادب وچ سب توں طاقت ور منیا جاندا اے تے عقل حیران کرن والے جناتی کم کردا اے بھاویں پہاڑاں وچ ہاتھی نہیں ہوندے پر سمیرغ دی روزانہ خوراک چالیہ ہاتھی اے۔ خدا دی قدرت وچ کجھ ناممکن نہیں ٹ ک بوستان سعدی چناں پہن خوان ِکرم گسترد کہ سمیرغ برقاف قسمت خورد
اُٹھ قطارے= اوٹھاں دی قطار وانگوں ( قدرتی نظام دے تحت) ، واڑا= حفاظتی واڑ، کھسّنا= کھوہ لینا، زِمیاں = زمین ورگے دُوجے سیارے،ڈلاندی آہی= ڈولدی سی،کوکے= قائم کرن والے کِل،