ورقہ 29

503
راتیں زاری کر کر روون نیند اکھیں دی دھوندے
فجرے اوگنہار کہاون ہر تھیں نیویں ہوندے
504
راتیں دیہاں سوز سجن دے رہن ہمیشہ سڑدے
راتوں دینہ پچھانن ناہیں نہ لہندے نہ چڑھدے
505
جنھاں ہِک گھُٹ بھر کے پیتا وحدت دے مدھ لالوں
علم کلام نہ یاد رہیو نیں گزرے قال مقالوں
506
دوئے جہان بھُلائے دل توں خبر نہ رہیا والوں
رانجھے وچ سما محمد چُھٹی ہیر جنجالوں
507
دلبر نال ہویا ہک جس نے اپنا آپ گوایا
تو ہیں پڑدا اگے چڑھدا توہِیں یار چھپایا
508
شاہ منصور اَنَا الْحَق کہندا کیوں نہیں شرمایا
تو ہیں محرم یار محمد کہندا کون پرایا
509
ریت وجود تیرے وچ سونا اینویں نظر نہ آوے
ہنجوں دا گھت پانی دھوویں ریت مٹی رُڑھ جاوے
510
پارہ گھت محبت والا گولی ہک بناوے
خاک رلے وِچ خاک محمد سونا قیمت پاوے
511
دُدّھ وجود تیرے وچ شیری روغن دار سمانی
مرشد لاوے جاگ پرم دی تاں جمےّ دُدھّ پانی
512
گل وچ پھاہ غماں دا گھت کے ذکروں چِھک مدہانی
ہمت نال محمدبخشا مکھن آیا جانی
513
کلی کہانویں نہ شرمانویں کُلّی ہے ایہ چاندی
سیر اندر سرساہی پانی سستی تدوکاندی
514
بوتے گال ریاضت والے آتش بال غماں دی
پریم جڑی گھت ویکھ محمد سبھ چاندی من بھاندی
515
نَحْنُ اَقْرَبُ آپ کو کنیدا ہک دم دور نہ دِسدا
اُس دے ڈیرے اندر تیرے پھریں لوڑ اؤ جس دا
516
محرم ہوویں کون بھُلا وے پڑ دا ہے وچ کس دا
جاںجاں دِسےّ آپ محمد تاں تاں آپ نہ دِسدا
517
اس دوئی دے دعوے پٹیاں سٹیاں دور حضوروں
نوروں سایہ ظاہر آیا چھپ نسدا پھر نوروں
518
جاں ایہہ سایہ دور ہٹایا سچ نکلے منصوروں
میں ونجے تاں پھیر محمد کون کہے توں دوروں
519
وحدت دا دریا وڈیرا جاں موجاں وچ آوے
ڈاباں وکھریاں بھن ڈھناں ہکو لہر بناوے
520
قطرہ ونج پیا دریاوے تاں اوہ کون کہاوے
جس تے اپنا آپ گواوے آپ اوہو بن جاوے
521
اوّل زہد ریاضت اندر بیٹھ کنارے گل کھاں
دُھپاں مینہ سیالے پالے سبھ سرے پر جھل کھاں

لفظالی :
اکھیں دی نیند دھوونا = سارا سماں جاگدیاں رہنا ۔مدھ لالوں = ارغوانی شراب وچوں ۔ معرفت دی شراب وچوں۔ علم کلام=Metaphysics
قال مقال = علم منطق ۔بحث۔ مناظرے ،رہیا = رہی آ ۔رانجھے وچ = جیہڑے اپنے آپ نوں ذات حق وچ فنا کر بیٹھے نیں اوہناں نوں کسے قسم دا مسئلہ در پیش نہیں ۔توہیں پڑدا = اے انسان تیری اپنی ہستی ای رب دی پچھان وچ رکاوٹ اے توں وچوں ہٹیں تے نظر آوی ۔دوئی = وحدت الوجود دا انکار۔پارہ = کیمیا گری وچ پارے دی ورتوں ہوندی اے سونے اُتےّ پارے دا اثر بھیڑا ہوندا اے اوہ سونے نوں چاندی رنگا کردیندا اے اوہ سونے دی گولی نہیں بنا سکدا۔ ہاں محبت دے پارے کولوں ایہہ معجزہ ہوسکدا اے ۔سمانی = سمائی ہوئی ۔بوتا = کٹھالی ۔پریم جڑی = محبت دی بوٹی ۔ڈھن = دریا دی چھڈی گزرگاہ وچ کھلوتے پانی داچھپڑ ۔