ورقہ 43

تعجب نمودن مالک برہجوم خلائق از شوقِ دِیدار یوسف و رُونمائی
دی خواستن ا ز نظار گیاں و گرد آمدن اور از رِکثیر
دے ساقی مے ساغر باقی پیوندیاں دُکھ جاوے
جذب قلوب تاثر والا ذوق جگر بھر پاوے
ورجیاں صبر نہ آوے دل نُوں دلبر دے دیداروں
رخت وِکے شہ جھات اُلارے ہوش لُٹے ہوشیاروں
دلبر شامی ماہ کنعانی پیغمبر رحمانی
آ وڑیا وچ مصری یوسف خلق رہی دیوانی
ایہہ کیہ شے لے آیا مالک وچ دِلاں حیرانی
نور خرید لیاندی کتھوں شکل جیہدی نورانی
یوسف تھیں وچ گھر گھر دُھماں خلقاں جوش کھلارے
گرد محلے مالک والے جمع ہوئے آ سارے
سارے یوسف یوسف کردے سوز دِلاں سر چایا
یوسف نُوں وچ حجرے مالک پردیاں وچ چھُپایا
خلق پھرے وچ شوق دیوانی ویکھاں مہ کنعانی
مالک ظالم ظُلم کیتوئی سورج کریں نہانی
کڈھ گھڑی پر پردے وچوں ویکھ لواں اِک واری
ایہہ کدی چیز چھپواون والی چھُپے نہ مشک تتاری
پردہ کھول نظر کر ویکھاں رمزاں تھیں تاثیراں
تے زُلفاں دے وچ زنجیراں کر دل قید اسیراں
چار چوپھیر سنیندیاں کُوکاں یوسف مصرعے آیا
سُنیاں اگے جیہناں نہ ڈٹھا ایہناں نوں شوق سوایا
مصر سُہیل یمن دا چڑھیا کھُلیاں نور بہاراں
بیکاراں ناچیز کھلاں نوں کر چھڈیا بلغاراں
مالک پا پوشاک شہانی سر دھر تاج زری دا
زرّیں چھٹی لئی ہتھ شانوں جلوہ مار پَری دا
تخت بلند رکھا کر بیٹھا خلق وڑی دربارے
ہر ہر جاء سلام کیتا سُو سبھاں علیک پُکارے
زر بفتاں دیاں فرشاں اُتے لوک بٹھائے سارے
شیریں آب طعام فواکے سبھناں پیش گُزارے
تحفے شامی خاصاں دتے ہوئی شاد تمامی
ہور کہو کیا حاجت کائی مرد پُچھے سو نامی
ایہناں کیہا کنعانی بندے شوق اساں دیداروں
ایہہ تمنّا نظر کرم تے جے منظور حضاروں