ورقہ 52

وال سوار جڑے وچ موتی حکمت نال پروئے
وال سیاہ وچ تاریاں وانگوں موتی روشن ہوئے
والاں لڑیاں موتیاں جڑیاں پیشانی وچ کاروں
کھِچ کناریوں ول ول کھڑیاں جان فدا دیداروں
تے اوہ رُخ پُر نوروں سورج گھر جڑے سیّارے
تار دو زُلف کنار پَلَمدے پُر پُر گوہر سارے
زرکش دیبا بو قلمونی گُل پیراہن پایا
کمرے زیریں پٹکا بدھا موتیاں جُڑت جڑایا
سر پر تاج زرّی دا دھریا تری گُہر دی آپے
گرد و زُلف چمک شب پچھلی لُٹ کھڑے وچ خوابے
تے پوشاک سوہاویں ساری بدن مبارک پائی
نعلیناں دی خوبی سُن سُن جھوک قلم نوں آئی
انور موتی قد جیہناں دے دانیاں جیڈ اناراں
پُر پُر جڑی عجب استازاں نال طلائی تاراں
والی کنّاں وچ سُنہری مُندریاں انگشتیں
تھیوے لعل سوہے سیارے جڑے جیہناں وچ پشتیں
کنگن ہتھ مرصّع زرّیں اوہ پُر گوہر سارے
گل وچ طوق جواہر والا قوس قزح وچ تارے
زیور تے پوشاکاں سبھے رلدیاں ملدیاں پائیاں
اوہ محبوب اگے پُر نُوروں ہُن چڑھیاں زیبائیاں
زرّیں چھٹی دتی ہتھ زیبا تازی پھیر منگایا
زرّیں ساز مرصّع سارا زینت وچ سوہایا
دوویں طرف رکاب سنہری مونہہ لگام روپہری
اسپ صباتگ اُڈے نہ جس تھِیں جُرّہ باز نہ بہری
شبدیزوں خوش خیز زیادہ شیریں تر گلگو نوں
مور دموں ہر بدر سموں تے چند نواں ناخونوں
دست آموز جنت دیاں واساں رام ہتھیں اسواراں
اسپ اجیہا حاضر آندا خوبیاں نال ناخونوں
یوسف نوں اسوار کیتا سُو کیا کہاں اوہ ویلا
جلوہ ویکھ پری دِیاں جایاں وگے جگر وچ سیلا
اوہ یوسف دی صورت سوہنی زیور زیب چڑھائی
مصری خلق سبھے زن مرداں اج وک چلّی لوکائی
جداں جمال نظر وچ آوے کڈھ جگر لے جاوے
ہوش اُڈاوے مار گواوے بیڑیاں پُور رُڑھاوے
مالک وانگ غلاموں پکڑے گھوڑا آپ لگاموں
آن رکاب پھڑی دہ مرداں فخر جیہناں وچ ناموں