ورقہ 56

گُزری دیر پیاں کجھ ہوشاں نیویاں کرن نگاہاں
چشم ضعیف نہ تابش جھلّے شوقاں قدم اگانہاں
مالک کرے بلند پُکارا مشتریو زر کڈھو
یوسف ویچاں مُل خریدو ایہہ بے خودیاں چھڈّو
سُن لوکاں سر نیویں کیتے قیمت کیہڑا تارے
اس دا مُل نہیں جگ سارا تے کد مصری سارے
جوش پئے وچ بزم ملُوکاں مُشتریاں دِل ڈولے
سینیاں وچ پئیاں سَے ضرباں وگے برہوں دے جھولے
چھاتیاں دے صندوقاں وچوں مال دِلاں دے کھولے
ایہہ وچ رونمائی سجن دے کم نکلے جاں تولے
مُر گھت گرہ دھرن وچ جیباں تے مڑُ پھیر نہ بولے
سرمایہ دی بے سامانیوں کوئی بھیت نہ پھولے
وقت وکن دا نیڑے ڈُھکا کھاون جگر ہُلارے
کرے پُکار پُکار نہارا یاد جیہنوں ول سارے
کون کریدے سوہنا بندہ نازک اکھیاں والا
پیر ادب سلطان عقل دا سخن فصیح اُجالا
احسن خلق کلاموں صادق فہم کمال رسائی
مٹھی بولی ہسدا متا عہد وفا ای صفائی
نوری شکل حیا پروردہ رکھے چشم نوائی
اندر زُہد امانت تقویٰ اُس دے جیڈ نہ کائی
صاف یقین غصبتھِیں خالی پُر حکمت تھی سینہ
صابر شاکر ذاکر عادل جس وچ حسد نہ کینہ
بولو مردو کون خریدے یوسف مہ کنعانی
وِنھ اکھیں جیں جاں دِلاں نوں جگر لُٹے پیشانی
صبر اُجاڑے عقل لتاڑے کاکل دی ویرانی
تے والاں دے ول ول دے وچ حیرانی حیرانی
کون خریدے نازک بردہ جس دیاں مصرے واراں
جس دے اِک دیدار کریندیاں جاناں جان ہزاراں
کون خریدے بدر منوّر حُسن جیہدا متوالا
سُخن فصیح صبیح پیارا بھواں مُقّوس والا
ناز وراں دی شاہنشاہی نام جیہدے پر آئی
جس دے جیہا کدی نہ ہویا تے نہ ہووے کائی
بہت لطیف ظریف کیہا اِک رہی نبوت باقی
کہن لگے مونہہ روک امرتھِیں جڑی سکونوں طاقی
سن مرداں پھٹ گئے کلیجے جان چلی وچ سائی
جھوٹھ نہ کیہا منادی کائی سارا سچ ایہا ای