ورقہ 30

522
ساس رہن رت ماس نہ ہوون کالکھ جُثے مل کھاں
جاں سُک ہوویں وال محمد زلف سجن دی رل کھاں
523
رُکھوں تروڑ لئے پت ساوے بھن مروڑ ٹکائے
ہرے بھرے سن آباں والے دُھپے پاء سُکائے
524
لنگری ڈنڈے گھوٹ بے چارے صورت بھن گوائےے
تاں دلبر دے پیریں لگی مہندی رنگ لگایئے
525
جُنبی دا ہِک وال دیہی دا غسلوں رہے جے سُکاّ
اوسے حال رہے گا جُنبی غسل نہ جائز اُکاّ
526
جے ہک وال تیرے وچ میاں اپنی آپ خودی دا
تاں بھی بہت نرگ نوں بالن اکسے عیب بد ی دا
527
کے کجھ بات عشق دی دساں قدر نہ میرا بھائی
ایہہ دریا اگے دا وگدا جس دا لاہنگ نہ کائی
528
جِس نے قدم اگیرے دھریاسویو سڑیا سڑیا
پر ایتھے سڑ مرن حیاتی اینویں گل نہ اڑیا
529
جیون جیون جھوٹا نانواں موت کھلی سر اُتے
لاکھ کروڑ تیرے تھیں سوہنے خاک اندر رل ستے
530
جنھاں عشق خرید نہ کیتا اینویں آ بُگتے
عشقے باجھ محمدبخشا کیا آدم کیا کُتےّ
531
جس دل اندر عشق نہ رچیا کتے اس تھیں چنگے
خاوند دے در راکھی کر دے صابر بھُکھے ننگے
532
عشقوں باجھ ایمان کویہا کہن ایمان سلامت
مر کے جیون صفت عشق دی دم دم روز قیامت
533
پل صراط عشق دا پینڈا سو جانے جو ٹرُدا
آس بہشت دلیری دیندا نرگ وچھوڑا ہرُدا
534
لاکھ جہاز ایسے وچ ڈُبےّ کیہڑا پار اُتر دا
ایس ندی دیاں موجاں تک کے دل دلیراں بُھردا
535
عاشق بنن سکھالا ناہیں ویکھاں نیونہہ پتنگ دے
خوشیاں نال جلن وچ آتش موتوں ذرا نہ سنگدے
536
جے لکھ زہد عبادت کرئیے بِن عشقوں کس کاری
جاں جاں عشق نہ ساڑے تینوں تاں تاں نبھے نہ یاری
537
جنھاں درد عشق دا ناہیں کد پھل پان دیداروں
جے رب روگ عشق دا لاوے لوڑ نہیں کوئی داروں
538
پاک شہادت قتل ہووے گا جے کر اس تلواروں
سدا حیاتی جان محمد مرنا ایس ازاروں
539
چاہیے عشق سپاہی ایسا میں نوں مار گوا وے
تھانہ کڈھ طبیعت والا صفتاں سب بدلاوے
540
پکا پَیر دھریں جے دھرنا تِلک نہیں مت جاوے
سو اس پاسے بہے محمد جو سر بازی لاوے

لفظالی:
ساس = ساہ ۔آباں = پتراں اندر پانی رس ۔چمکاں ۔لنگری = دوری کُونڈی ۔جُنبی = استری بھوگن والا۔ مباشرت کرن والا ۔دیہی = سریر ۔ اگے=اگ۔ لاہنگ = لاہنگھا ۔ پار لنگھن دا تھاں ۔بگُتے = وگتے مصدر وگوونا مذمت کرنا۔ بدنامی لینا اپنے آپ دا ناس کر کے گوا لینا ۔،آبگتے = نہ ای اوندے تے چنگے ساں ۔کیا آدم۔۔۔۔۔۔ = بے عشقے آدمی کتے دے برابر نیں ۔خاوند = مالک ۔کویہا = کہیو جیہا یعنی بالکل نہیں ہوندا ۔پل صراط = پل صراط دے اک پاسے بہشت تے دوجے پاسے نرگ یا دوزخ اے ۔گُھردا = نقارے نال اعلان کررہیا اے ۔بُھرنا = گھٹنا۔ ہولی ہولی تھلے بہنا ۔ داروں=دارو۔ علاج ۔تھانہ= مقام۔ ہیڈ کوارٹر ۔طبیعت = بشر دی حیوانی فطرت ۔تھانہ کڈھنا = تھانے تے قبضہ کرکے عملے نوں بے دخل کرنا۔سو=اوہ، پاسے=پاشے دا کھیل،