ورقہ 69

ایہہ محراب دو اُبرو والی سجدہ گاہ دِلاں دے
مژگاں نے دُکھ نیزیاں دے سر چاڑھ میرے وَل آندے
ایہہ دو نین دو ابُرو ہیٹھا واہیاں جیہناں کماناں
اج لبھّا اوہ جس نوں عمروں تھکی لبھ زمانہ
ایہہ اوہ نیزہ باز بہادر فتح جیہدی جنگاہیں
جس دے دردیں عُمر گزاری رووندیاں بھر آہیں
تے وچ جس دیاں درد جُدایاں گُزریاں کالیاں راتیں
میں عاجز نوں بحر غماں دے روہڑ گیا گھت جھاتیں
ایہہ اوہ باز جھکایاں ڈاراں کونج رہی میں پنجے
توڑ شیرازہ صبر میرے دا گُھتی جان شکنجے
اج مقصود وکیندا ملیا مُل وہاجاں لکھیں
رو رو گُزر قراروں رہیا ویکھ سجن دیاں اکھیں
رہن دیاں ایتھے وِکدا یوسف ملی خرید نہاری
حاضر مال رہے وچ مجلس ڈُھکے آن بُپاری
ایہ بضاعت نور خزانہ اُسدی قیمت بھاری
ہُن گاہک دی حال حقیقت آکھ سناواں ساری
کون ایہی کس تھانوں چلی کتھوں عشق لیایا
کیہ کیہ پئے جنجال دکھاندے کیویں کہ حال وہایا
کیڈک پاس جمع کر رکھی دَرداں دی سرمایہ
سورج عشق چمکیا سر تے وقت جلّن دا آیا