ورقہ 31

541
یار کرے جد اپنا تینوں چھُٹسن ہور اشنایاں
ماں پیؤ سجن یاد نہ رہسن حرص نہ بھیناں بھایاں
542
جدوں جمال کمال دسےگا سوہنا لعل پیارا
ویکھن نال حلال ہوئیں گا چھوڑ جنجال پسارا
543
خلقت تھیں گم ہویا چاہسیں گم ہویا تد پاسیں
براّں وِچ درندیاں وانگوں چھپ چھپ جھٹ لنگھاسیں
544
نالے لاغر لِسّا تھیسیں نالے زور توانا
نالے عاقل دانا ہوسیں نالے مست دیوانہ
545
کدے نچلا بیٹھ سُکھلا دھاگے لاسیں جُلیّ
کدے اُٹھاسیں اگ جلاسیں جُلیّ بستر کُلیّ!
546
جنھاں دلبر پایا اوہناں نہ پرواہ کسے دی
وچ گوشے توحید اوہناں دے ناہیں جاء کسے دی
547
فارغ ہین اوہ عقلوں ہوشوں ٹُردے اپنی ٹورے
اوراں دے پند مت نہ سُندے کن اوہناں دے ڈورے
548
سُکےّ پَیر ندی تھیں لنگھن وچ سمندر چلدے
ہر گز مثل سَمندر کیڑے آتش وچ نہ جلدے
549
نہ چنگیاں اکھوایا لوڑن نہ خلقت دی منتے
لوکاں دی کد بھاوت چاہن جو بھاوے در کنتے
550
وچوں نور الٰہی رنگے باہروں کالے کلفی
نہ اوہ میرے وانگوں یارو دل جنجو گل الفی
551
مِٹھی چھاں اتے پھل والے وانگ انجیر انگوراں
نہ بے فیض اساڈے وانگوں کوڑے متھے گُھوراں
552
خاص انسان ایہناں نوں کہیے جنہاں عشق کمایا
دھڑ سر نال نہ آدم بندا جاں جاں سِرّ نہ پایا
553
اوپر جُلّی مونہوں جَلیّ اندر نہیں تجلیّ
جب لگ عشقوں جان نہ جَلیّ بھٹھ جُلی کیا جَلیّ
554
اوّل الف اکلا ہونویں نقطے چھوڑ جنجالی
ہکو صورت ہکو ہندسہ بہت حسابوں خالی
555
کڈھیں ول کھلونوِیں سِدھا کر کے ہمت عالی
اندر الفت ہوئی الف دی تاں الفی گل ڈالی
556
چارے ترکاں جوڑ بناویں تاج مبارک والے
دنیا عُقبیٰ اپنے آپوں ترک ترک دی نالے
557
تاج سوہے جے نبی سلیماں ہد ہد کول بہالی
تاں ہیں توں ولایت والی رتبے عالی عالی
558
جُلیّ دے ترے اکھر بھائی سمجھ اشارت ناموں
جیموں جاگن سنجھ سویرے لنگھن کٹن لاموں
559
یئیوں یاد کرن ہر ویلے دلبر ہر انداموں
جُلیّ وِچ محمدبخشاچھپ رہئو ہر الزاموں

لفظالی:
حرص = محبت ۔گُم ہویا = حاضر ناظر دے باوجود غائب ۔براں = اجاڑ۔ غیر آباد تھاں مارو ۔ تھل ۔ ریگستان ۔نچلا = چپ چاپ ۔ پرسکون ۔ سمندر=مسلسل اگ بلدے رہن نال اگ وچ پیدا ہوون والا کیڑا ۔منتے = منتا۔ مانتا وچ ۔ عقیدت۔ ارادت وچ ۔بھاوت = پسندیدگی دی خواہش ۔ کنت = مالک ۔ خاوند ۔کلفی = وسمے ۔ خضاب دے کالے رنگ والے ۔جنجو = زنار، ہندو بت پرست دے گل پایا دھاگا ۔الفی = مسلمان فقیراں دے گل پایا ان سلالما کڑتا ،گھُوراں = گھوریاں متھے دے وٹ ۔سر = بھیت ۔ کنہ ۔جُلی = خرقہ۔ گودڑی ۔جلیّ = ذکر جلی اچی اچی ذکر کرنا ۔الف = اللہ ۔تجلی = نور۔ ذات دا جلوہ ،چار ترک = ترک دنیا۔ ترک عقبی۔ ترک مولا۔ ترکِ ترک ۔ہرانداموں = ہر جسم ہر صورت وچ ۔