ورقہ 86

دربیان گُزر انیدن زُلیخا سالی رادر گریہ و زاری و فراق و بیداری

روز پنجاہ ہزار ورھے دا رات ایہا اجے باقی
دے اِک جام صبر دا بھریا گھول گھتی میں ساقی
سال اجیہاں روزاں والا سر پر کُوکاں کردا
دیکھ غماں دا وقت دوراڈا جگر ڈولے دل ڈردا
رتّو رت رہے غم واسی پھر دیاں جان بہاراں
رنگ برنگیں وسدیاں دسن غم درداں دیاں واراں
ناگ برہوں ڈس گیا جگر نوں تے اج پاس نہ راقی
زہر رسی متلّون ہو ہو وچ تریاق عراقی
ایہا زبر چھوڑاوے بندوں تور اغلال اعناقی
جان چقماق برہوں جھڑ وگے سر پُرزے حُراقی
٭٭٭
چیت
چڑھیا چیت چتاراں دِلبر مینوں نظر نہ آوے
دل وچ ہر دم اوہا وسدا نہ وچ چشم سماوے
میں تیری ہو رہیاں بندی کیوں توں نظر نہ آویں
رچ مِچ رہیوں دِلے وچ میرے کس تھیں نین چھُپاویں
تانگھ تیری میں آ کِت ویلے جھات گھتّاں جند واراں
بال النبہ کتھے لکُیوں میریاں سُنی پُکاراں
میں جس شے نوں میں کر کیہا وچ ضمیر وچاراں
تُوں کر کہندی دور وسیندی ڈر ڈر سچ نتاراں
٭٭٭
بیساکھ
کُھل بیساکھ پیاں گُلزاراں جُھلیاں باد بہاراں
سُنبل شاخاں نال سوہاں دے توڑ زُلف دیاں تاراں
دل میرے خم زُلف تیری دے پائے پیچ ہزاراں
میں وچ پیچ پھَسی پَھس مرناں یار نہ لینیاں ساراں
گُل گُل دے سر بُلبُل روندی مالی دِی گُلزارے
تے میں لبھدی ڈالی ڈالی مالی دے چمکارے
٭٭٭
جیٹھ
جیٹھ ہوائیں سینہ ساڑن وانگ جھوریوں یاراں
کون اوہا جس میں غم گھتّی کس تھیں پُچھاں ساراں
اے محبوب محبت تیری کیڈک آفت بھاری
صبر لُٹے تے ہوش لُٹاوے جان کھڑے کِڈھ ساری
دل میرے وچ توہیں آیا بہہ بہہ گھتیں جھاتیں
ساعت بھر ہو ظاہر ویکھن نین میرے بہہ گھاتیں
٭٭٭
ہاڑ
ہاڑ مہینے سر پہ گُزری دُھپ وِچھوڑے والی
سورج غماں دے ہڈیاں مغزوں کر دِکھلایاں خالی
شمس دو پیکر دے وچ سینے جیوں اج چمکاں مارے
ایویں زخم تیرا اج میرے سینے دے وچ کارے
توں سُفنے وچ روندی تپدی چھوڑ گیوں کر بیرے
جے اک وار ملیں مُڑ واراں جان قدم وچ تیرے
٭٭٭
ساون
ساون چڑھے بدل سر آہوں ندیاں نیر اوچھالے
نین میرے ہنج لہریں ڈُبدے بحر فراق وچالے
آب سروں وَیہہ رُڑھِیاں یارا جند پلک یا گھڑیاں
میں منتارو کشتی باجھوں نَیں ڈوبو وچ وَڑیاں
کالیاں گھاٹاں سوہایاں سر تے آہیں جوش کھلارے
یار ملے میں بنّے لگدی ملے پلک وچ تارے
٭٭٭
بھادوں
بھادوں بھاء میرے دُکھ بھارے تپے دماغ بخاروں
روئے زمیں دا تختہ گلیا میرا گریہ زاروں
حال میرے دی مُشکل بھاری ویکھ کدی اک واری
خوش اقبال اوہا جس تیرے جان قدم پر واری
٭٭٭