ورقہ 32

560
گل وچ سیلھی دے نشانی جھل عشق دا پھاہا
چھڈ گرانی ہو سیلانی پکڑ سجن دا راھا
561
گل میری ہتھ تیرے شاہا عذر نہیں کجھ آہا
سیل سجن دی سمجھ محمد تاں سیلھی دا لاہا
562
نفس فسادی مارن کارن کَس لے کمر جوانا!
آسا دا پھڑ عاصا ہتھ وچ ہو جا شیر توانا
563
رات ہنیری ڈھونڈ چوپھیری جنگل بار ویرانہ
پتھر طور دِلے دے اُتے دِسےّ نور شہانا
564
کتیں سوت اخلاص عمل دا بیٹھ نورے دی لوئی
پان پریت دُکان دُکھاں دا اُنے کریگر کوئی
565
سُدھ بُدھ ہوش جہانی ساری وتیّ کملی ہوئی
اوّل بنھ گلو طعاموں پھیر گلوبند لوئی
566
سڑ آپوں دے لذّت اوراں مثل شراب کباباں
آپ فنا ہو ذاتے رل کھاں وانگن آب حباباں
567
جیہناں جام الستوں پتیارل کے نال اصحاباں
روز حشر تک نہیں محمد ترو ٹک مست خراباں
568
چھم چھم تیر پون تلواریں عاشق نہ ڈر رہندے
عشق پرہیز محمدبخشا نہیں کدے رل بہندے
569
محرم باجھوں بھیت سجن دا ہر ہک نال نہ کہندے
بدی ملامت قہر قیامت سوسو سر پر سہندے
570
عشق لگا تاں شرم کویہا اوہ آتش ایہہ پوُلا
لائق ہو نالائق بندے سُن بھائی مقبوُلا
571
بیدرداں نوں پچھو ناہیں درد منداں دا رُولا
مر جیون تاں واقف تھیون عشق نہیں پٹ کولا
572
دیندے جھڑک جواب پیارے پھیر نہ آوِےں اِتھے
جے آویں تاں قتل کراں گے اسیں کتھے تُوںکِتھے
573
جا میاں نیونہہ لا اس جائی قدر ہوئے کُجھ جتھے
جے لکھ دین صلاح ونجھن دی عاشق ہِک نہ مِتھے
574
چیتا چیتا کنڈ نہ دیویں عشق لڑائیوں اَڑیا
سولے جاسی برخورداری جو اس سُولی چڑھیا
575
مُوْتُوْاقَبْلَ اَنْ تَمُوْتُوْا حرف صحےح جس پڑھیا
اس میدان محمدبخشا سر دِتا پِڑ کھڑیا
576
جے توں عاشق بنیا لوڑیں پلا پکڑ سجن دا
جان منگے تاں دے شتابی صرفہ کریں نہ تن دا
577
تن بھی تاہییں جنت جاسی خلعت لئے مرن دا
دوزخ موت محمد جھاگے رکھ کے چاہ ملن دا
578
ہالی لوک کریندے واہیاں سُکدے دُھپے سڑدے
سارے رنج بھُلےّ جد رج کے مِن پائیاں گھر کھڑ دے

لفظالی:
سیلھی = چُبھن والے والاں' جت دا وٹیا رسا جیہڑا فقیر گل وچ پاکے غلامی دا ثبوت دیندے سن ۔گرانی = کسے گراں پنڈ وچ مقامی ہوکے رہنا ۔سیل = مزاج طبیعت۔ سبھا ۔لاہا = نفع ۔ فائدہ ۔آسا = امید ۔لوئی = لو وچ ۔ چانن وچ ۔پان پریت = پریت پاونا۔ نیہا لگاونا ۔کملی ہوئی وتی = کملی ہوکے پھر دی رہی۔گلو = گلا۔ سنگھ ۔طعاموں = کھانے توں ۔تروٹک = خمار ۔نشہ ٹٹن تے تھکاوٹ ۔پُولا = سکے ککھاں دا بنڈل ۔رُولا = طور طریقہ ۔پٹ = ریشم ۔ چیتا چیتا = خےال دا خیال کریں کتے چیتا نہ بھل جائیں ۔برخورداری = پوری کامیابی۔ نیک بختی تے نیک نامی ۔پڑ = میدان موتو اقبل = حدیث پاک اسرارالمرفوعہ ملا علی قاری (موت توں پہلے مرو) ۔پائی = چار ٹوپے دس سیردانے ۔ڈھونڈ= راہ تلاش کر،