ورقہ 33

579
ہکناں دے کئیں کھیت کمائے چھیکڑ گڑے گوائے
پوری پئی پریت ایہناں دی مردے باز نہ آئے
580
عاشق ناامید نہ ہوون دن دن لمیاں آساں
جے سو وار کھدیڑن در توں کوکن کدے نہ جاساں
581
جے توں طالب راہ عشق دا چھڈ وہماں وسواساں
ہمّت دا لک بنھ محمد رکھ آساں پِیاّ پاساں
582
دلبر جس دا کوئی نہ ثانی جوبن دا متوالا
ہار نہ نیت پریت اوہدی دی نیہوںکمائیں لالا
583
جس بِن ہکدم جال نہ تھیندی اس بِن کیونکر رہسیں
دے جواب کھدیڑے توڑے فیر اوسے ول ڈھسیں
584
جے دلبر منہ لائے ناہیں توں مکھ مول نہ موڑیں
ڈوہنگی ندی عشق دی اندر جیو جامہ سبھ بوڑیں
585
جے اوہ نال نہ چلن دیوے پچھا کدے نہ چھوڑیں
لَا تَقْنَطُوْا مِنْ رَحْمَۃ والی آس امید نہ توڑیں
586
جاں توں سردے پیر بناکے مگر سجن دے چلیوں
تاں پھر پرت دلاسا دیسی جانی سنگت رلیوں
587
کہسی ہور نہ کوئی تیرا توڑے سیں توں مندا
پئی قبول محبت تیری میں صاحب توں بندہ
588
کیتے رب سچے دے اُتّے صابر شاکر رہنا
اس بن ہور نہیں کوئی والی ونج کس دے در ڈھینا
589
تختوں لاہ بہاوے قیدے ہو نمانے بہنا
دُکھیں بھریا حال محمد فیر اوسے نوں کہنا
590
آپے غم لگاوے سانوں آپ کرے غمخواری
آپ پھٹّے چِھک گلییں سٹے آپ کریندا کاری
591
بادشہاں دا شاہ کہاوے نال غریباں یاری
عُسروں یُسر غریب نوازی کم سدا سرکاری
592
اس نوں بھلے بھلیرے ساتھیں فرماندار سپاہی
کجھ پرواہ اساڈی ناہیں دائم بے پرواہی

استغنا دی منزل دا ذکر
593
بے پرواہی منزل ناہیں جس وچ سُود سوداگر
بے نیازے دی چکھ اگے دو جگ ککھ برابر
594
ست دریا اوتھے ہک قطرہ ست دوزخ چنگاری
اٹھ بہشت ہوئے گم سارے تاں ہک پھُل بہاری
595
باغ بہشت ویرانے دِسدے دوزخ سارے بُجھے
کیڑے دے منہ سو سو ہاتھی خسخس وانگر سُجُھےّ
596
جس جنگل دے کیڑے دے منہ سو سو ہاتھی وہندا
کالا کاگ جدوں رج کھاوے پھیر کے باقی رہندا

لفظالی:

کمائے = ہل واہ واہ کے زرخیزی دے قابل بنائے ۔کھدیڑن = مگر پے کے چِک کڈھن ۔نیہوں کمانا = عشق دے سارے تقاضے پورے کرنا ۔ ڈھسیں=ڈگیں گا۔ الریں گا۔جیوجامہ = جان تے دنیاوی مِلک ۔بوڑیں = ڈوب دئیں ۔لاتقنطُوْا مِنْ رَّحْمَہ = ٹ ک سورہ الزمر = ٥٣ ۔اللہ دی رحمت توں بے امید نہ ہوجاؤ ۔پھٹے = پھٹ زخم لائے ۔کاری کرنا = علاج کرنا ۔عسروں یسر = ٹ ک قرآن مجید 94/5-6۔ساتھیں = ساڈے کولوں ۔ چکھ=سنسکرت چکش اکھ ۔ست دریا = دنیا دے سارے سمندر۔ احمر۔ اسود۔ اوقیانوس ۔ ہند ۔ عرب۔ کاہل ۔ منجمد شمالی تے جنوبی ۔اٹھ بہشت = خلد۔ دارالسلام۔ دارالقرار۔ جنت عدن ۔ جنت الماویٰ۔ جنت النعیم ۔ علیین فردوس ۔ست دوزخ = دوزخ دے ست طبقے = سقر۔ سعیر۔لظیٰ حطمہ جحیم ۔ جہنم ۔ ہاویہ، رکھ آساں پیّا پاساں=محبوب دے قرب دی آس رکھ،کیڑا=(١) مچھر جہنے نمرود دی فوج دے ہاتھی ختم کیتے نک راہیں نمرود دے اندر وڑ گیا تے اوہدی موت دا باعث بن گیا(٢) حرص ہوس دا کیڑا جہنے وڈے وڈے انسان مارے نیں ،کالا کاگ= عشق جیہڑا حرص ہوس دے کیڑے چُن چُن کھاندا اے،