ورقہ 34

597
لاکھ ملائک نوری غم تھیں وانگ پتنگاں جلیا
تاں ہک آدم خاکی والا روشن دیوا بلیا
598
لاکھ جُثہّ طُوفانے اندر ڈُب بے روح ہویا سی
اس درگاہ اندر مقبولی تاں ہک نوح ہویا سی
599
سے لشکر ہک مچھر مارے ہک خلیل اعظم توں
لکھ معصوم شہِید ہوئے سن ہک موسیٰ دے دم توں
600
لکھ خلقت گل جنجو پائے خارج ہوئے ایمانوں
تاں ہک مہتر عیسیٰ ہویا محرم سِرّ حقانوں
601
لکھ جانی لکھ چِت وکائے سنے چِتاں دے سائیں
تاں معراج ہویا ہک راتیں ختم نبیاں تائےں
602
نویں پرانے چنگے مندے ایتھے قدر نہ کائی
خواہے گریہ زاری کیجے خواہے کرو نہ بھائی
603
جے کر سبھ جہان محمد بھُجن مثل کبابے
اس منزل وچ معلم ہوندا وانگ خیالے خوابے
604
جے لکھ جانی صدقے ہوون جھل کے تیغ پرم دی
کجھ پرواہ نہیں دریاوے ہِک قطرے شبنم دی
605
جے لکھ سیس رلن وچ خاکو کر کے عشق پیارا
جیوں سورج دے نوروں چھپیا ذرہ ہک نکارا
606
سبھ اسمان جھڑن تاں جاپے پت درختوں جھڑیا
چوداں طبق ڈُبن تاں جِیویں ککھ باروں ہک کھڑیا
607
دوئے جہان محمدبخشا جے سبھ ہون نبو دے
گھٹ ہویا ہک ریتوں دانہ وچ تھلاں دے تودے
608
آدم جنّ ہوون قربانی کنی ہکو بارانی
جیو جامے جل جاون سارے کُھتھا وال حیوانی
609
جے سبھ عالم فانی ہوون اوتھے کجھ نہ خطرہ
کے ہویا کے گھاٹا وادھا گیا سمندروں قطرہ
610
کِتھے آدم کِتھے پریاں کِتھے حور فرشتے
کِتھے شاہ امیر سوداگر کِتھے ہور سرشتے
611
کِتھے نی اوہ بدن نورانی کِتھے جانی پاکاں
ہے کے تھاں محمدبخشا واؤ پانی اگ خاکاں
612
جو ہویاں جو ہوسن اگوں کیا نیکی کیا بدیاں
بے پرواہی دے وچ نیرے کد قطرے تھیں ودھیاں
613
سہل نہیں ایہ وادی بھائی سہل تکیندے جاہل
عملاں دا ایہ حال محمد پر ہو بَہؤ نہ کاہل
614
جے نت کریں جہاں ہک پینڈا مت جانی کجھ ٹُریا
پرت تکیں تاں اوہنیں پیریں دو تن قدم نہ ہُریا
615
کس سالک اس رستے ٹُرکے اوڑک انت لیاسی
اس در دے دا دارو بھائی کس دے ہتھ پیاسی

لفظالی:
غم = غصہ۔ حسد ۔مقبولی = مقبول ۔ہک مچھر = اک لنگا مچھر جیہڑا نمرود دی نک وچ وڑ گیا سی جیہدے نال اوہدی موت ہوگئی۔ نمرود دے سینکڑے لشکر حضرت ابراہیم خلیل اللہ دی دعا برکت نال اللہ نے مارے ۔لکھ معصوم = فرعون نے نجومیاں دی دس تے حضرت موسی دی پیدائش نوں روکن لئی ساریاں آسناں مانواں دے معصوم بچیاںنوں پیدائش توں پہلاں ای شہید کردتا سی ۔جنجو = زنار ۔یہودیاں دے لک نال بجھیا مذہبی دھاگا ۔لکھ جانی = اللہ تعالیٰ نوں ملن دی تانگھ وچ لکھاں جاناں قربان ہوئیاں۔ لکھاں دل سنے دل دے مالکاں دے قربان ہوئے پر اللہ تعالیٰ نے اوہناں نوں اپنے توں دور مناسب فاصلے تے رکھیا ۔تیغ پرم دی = عشق دی تلوار ۔کُھتھا وال حیوانی = معمولی۔ بے قدرا حیوانی وال (کسے دی جُھوں) کھوہ لین جناوی اثر نہیں ہووے گا ۔واؤ پانی=اربعہ عناصر ۔جہاں اک پینڈا = سارے جہان دا سفر ۔سرشتے = سرشتے دار۔ محکمے دے سربراہ