ورقہ 35

616
جے ٹُر نوں دق ہو کھلوویں مار سجن دی وگے
جے دوڑیں تاں کیڑ تلی دی سدا اگے ہی اگے
617
نہیں کھلونا لائق تینوں نہ ٹریاں پندھ مُکدا
مشکل کم پیا سر تیرے کوئی علاج نہ ڈُھکدا
618
نہ سُرمار اتے سرماریں ترتے بیٹھ چُپیتا
چھڈ دے کم اتے کم کر کھاں یاد نہ آنی کیتا
619
نالے ترک کموں کر بندے نالے کم کمائیں
اپنا ہئی کم کریں نہ تھوڑا زور بتیرا لائیں
620
جیکر کار تیری ہے کاری رہیں لگانت کارے
جیکر کار نہ کاری آوے بہت اوتھے بیکارے
621
ترک کریں اس سارے کموں جو کجھ کیتوئی اگے
کرنا تے نہ کرنا تیرا ایہو چنگا لگے
622
اوّل سِکھ شناس محمد لائق کار کرن دی
جب لگ کار بیکار نہ پرکھیں کرنی ہے کد بندی
623
لاکھ کروڑ اساں تھیں چنگے خاک ہوئے اس جائی
جے جگ ہوئے نہ ہووے ایتھے ہے پرواہ نہ کائی
624
کار کریںجو کہے کریگر کریں ہنکارنہ کاروں
عملاں تے دھر آس نہ ذرہ فضل منگیں سرکاروں

توحید دی وادی داذکر

625
اگوں منزل آوے بھائی وچ وادی توحیدے
عابد تے معبود ملیندے دوئی نہ پیر مریدے
626
سرکھڈھن ہک گلمے وچوں لاکھ سراں دے رل کے
اس گلمے تھیں باہر نہ جاوے خسخس دانہ چل کے
627
ازل ابد دا جامہ ہکو ایہہ گلما وچکاروں
ہر دا روپ محمدبخشا ہے ہکسے سرکاروں
628
توڑے بہتے روپ دسیون توڑے تھوڑے تھوڑے
اصل اندر سبھ ہک ہوون گے ندیوں نیر وچھوڑے
629
ازلوں گِھن ابد تک بھائی کم ہویا جد سارا
کون دویا پھر باہر رہسی ہکو ہک اکارا
630
ہکس دیوانے کولوں پُچھیا شخصے ہکس پیارے
دس اسانوں کے کجھ کہیے ایہہ جگ عالم سارے
631
اگوں پھیر دیوانے کہیا دساں نال مثالے
سِتھےّ دا ہک رُکھ بنایا کاریگرے کمالے
632
ڈالی پترّ پھُل بنائے سکڑے کلی ممولی
ہتھ وچ ملے بھجے سبھ چِتر بنے ہکو مُڑ گولی

لفظالی:
تلی دی کیڑ = اپنے نالوں اگے دوڑ دے ہوئے لوکاں دے پیراں دیاں تلیاں دی آواز ۔سرمار = بے سُرا گویا ۔ترتے بیٹھنا = سوچ فکر وچ گوڈیاں تے منہ دھرکے بیٹھنا۔ تہرا ہو کے بیٹھنا ۔چھڈ دے کم = ریا کاری دے کم چھڈ دے پر اک کم ضرور کر کہ اپنے کیتے کماں دا ذکر نہ کریا دوچ نہ لیا ۔ شناس=شناخت۔ پہچان ۔جائی = تھاں تے ۔کریگر = کاریگر۔ مرشد ۔توڑے = بھانویں ۔اکارا = (١) اکلا (٢) نر انکار جہدی کوئی خاص شکل نہیں بے چوں ۔سِتھّا = ماکھیوں دا موم ۔سکڑے = سک ۔ چھال ۔ممولی = گولی ورگانم دا پھل ۔چتر = نقش