ورقہ 5

71
وٹے دے وچ لعل ٹکاندا جانن قیمت پاندے
ساوی شاخوں ویکھ نکالے گُل پھل رنگ رنگاں دے
72
سِپاں اندر موتی کردا رکھ کے قطرہ پانی
شِکماں وچوں باہر آنے صورت بی بی رانی
73
اگاّ پچھا اس نوں معلم نہ چھپیا ہِک ذرّہ
دانا بینا کشف قلوبی حییّ قیّوم مقرّہ
74
کناں باجھوں سننے والا تکدا ہے بِن نیناں
باجھ زبان کلام کریندا نہ اس بھائی بھیناں
75
غالب امر مبارک اس دے نہ ہویاں نوں کیتا
ہویاں نُوں نابود کریسی آپ ہمیشہ جیتا
76
خاک ہویاں نوں دوجی واری مُڑ کے زندہ کرسی
وچ میدان قیامت والے ہر کوئی لیکھا بھر سی
77
سبھ جہان کوکیندا ایہو ہے تحقیق الٰہی
لیکن کُنہ مبارک اُس دی کسے نہ لدھی آہی
78
صفت اوہدی نوں فہم نہ پُہتا ذاتے وہم نہ پاندے
اس ڈابے کئی بیڑے ڈوبے تختہ ہویا نہ باندے
79
اس میدان نہ چلے گھوڑا شینھ حیرت دا گجے
خاص پہلے لَا اُحصِی کہ کے اس دوڑوں سن رجےّ
80
ہر جائے نہیں چلدی بھائی جِبھے دی چترائی
کن ڈورے جِبّھ گُنگی ہوندی جاں کوئی جاگہ آئی
81
اس مجلس دا محرم ہو کے پھیر نہ مُڑدا کوئی
جو ایہ مست پیالہ پیندا ہوش کھڑاندا سوئی
82
اس خونی دریاؤں ڈردے عقل فکر دے سائیں
کس دی بیڑی باہر آئی پہنچ اجیہئیں جائیں
83
جیکر تینوں طلب محمد اس رستے ٹُر اُڑیا
مڑ آون دی رکھ نہ ہِکھی ایتھوں کوئی نہ مڑیا
84
نال ریاضت کریں صفائی سان فکر دی گھس تُوں
مت خوشبو عشق دی کرسی طالب عہد اَلَستُوں
85
پَیر طلب دے کھڑسن اوتھے اُڈیں حُب دے بالوں
اگوں پکڑ یقین لنگھا سی پڑدے پاڑ خیالوں
86
ایہ دریا مُہانے باجھوں لنگھن مول نہ ہوندا
رُڑھ مردا یا ڈُبدا جیہڑا آپ ہکلاّ پوندا
87
جنھاں ملاح مناےا ناہیں بیڑے چڑھے نہ اُس دے
راہوں پرت پئے وچ باراں مُفت نکرمے مُسدے
88
رستہ چھوڑ نبی دا ٹریاں کوئی نہ منزل پُگدا
جے لکھ محنت ایویں کریئے کلّر کول نہ اُگدا
89
رستہ صاف نبی دے پِچھے ہور نہ جانو کوئی
اوہو کرے شفاعت ساڈی تاہیں مِلسی ڈھوئی

لفظالی:
وٹا = پتھر ۔قیمت پاندے = جوہری ۔باندے = ظاہر ۔ لا احصی = ٹ ک کشف المحجوب پنجابی ترجمہ صفحہ ،کشف قلوبی= دلاں دے بھیت جانن والا ۔ مقّرہ = لازماً ۔ بے شک ۔لیکھا بھرسی = حساب ادا کرے گا، کُنہ = وچلا بھیت ۔ذاتے وہم نہ =اوہدی ذات دا ادراک نہیں ہوسکدا ۔ڈابے = ڈاب تے ،ڈاب= وگدے پانی دا ڈوہنگھا ٹویا ،رجے = Fed up۔ بے وسی مجبوری دا اعلان کیتا ۔جبھے دی چترائی = زبان بیان دی چالاکی ، سائیں=مالک، کھڑاندا = گم کربہندا ،ِہکھی= آس امید ،عہد الستوں = الست بربکم آکھن دے دن دا عہد ۔بالوں = کھمباں نال ۔مہانے=ملاح۔ہکلا = مرشد دی اگوائی باجھوں۔ لُگا ۔کول = کنول ، نکمرے= بد قسمت، مُسدے= لُٹے جاوندے،آنے= لیاوے،خاص پہلے، مت= شائد،