ورقہ 37

651
دم دم تیغ غماں دی مارے حیرت اگ نہ بُجھے
آہیں درد اتے لکھ سوزوں رات دہاڑ نہ سُجھے
652
جاں اوہ مرد حیرانی والا جا پہتا اس جائے
ہوندا گُم تحیرّ اندر اپنا آپ نہ پائے
653
جیکر اس تھیں پُچھے کوئی ہیں توں یا نہیں ہیں
اندر ہیں یا باہر بیٹھا ایتھے یا کہیں ہیں ؟
654
فانی ہیں یا باقی میاں یا نہیں توں دو ای
دس سانوں کجھ پتہ نشانی حال تیرے کے ہوئی
655
کہندا اصلی خبر نہ مینوں بیٹھا یا کھلویا
عاشق ہاں پر پتہ نہ رہیا کس پر عاشق ہویا
656
نہ میں مسلم نہ میں کافر خبر نہیں کس چالی
نالے ایہ دل عشقوں بھریا نالے ہے مُڑ خالی
657
جاں پُہتا اس منزل اندر رستہ منزل چھپدا
رستہ منزل کس دا بھائی نالے ہے دل چھپدا
658
حیرت سر گردانی تائیں کیکر اگے کھڑئیے
شہر اتے دروازے چھپدے کتھوں نکل وڑئیے
659
جاں کوئی مرد اس جائی پہتا گِلیؤں شُکر ہوئیگا
کُفرے وچوں ایماں کہندے ایماں کفر ہوئیگا

فقر دی منزل

660
وادی فقر فنا دے اندر اگلی منزل آئی
فقر فناء اندر چپ بہتر گل نہ جاندی بائی
661
فرموشی دی منزل ہوئے گنگے ڈورے جھلے
جاں ہک سورج روشن چڑھیا سبھ تارے چُھپ چلے
662
کانگ چڑھی دریا فقر دی جُنبش اندر آوے
پتھر نقش بریتے بیلا بوٹے ریت چھپاوے
663
دوئے جہان محمدبخشا موج اس اِک دریاؤں
جے کوئی ایہ گل منے ناہیں کسر اوہنوں سوداؤں
664
ایس ندی وچ چُبھی مارے جے کوئی ہمت کر کے
سدا سُکھالا رہسی بھائی کے کم باہر ترکے
665
ایس ندی دی چُبھی اندر چِت ہمیش سُکھالا
گم ہوون بِن ہور نہ بھاوے واندے پین کشالا
666
حکمے نال اس چُبھی وچوں جاں سر باہر آنے
تاں اوہ کاریگریاں ویکھے تک تک بھیت پچھانے
667
اس چُبھی وچ غیر نہ مِٹدا جاوے ہِک ہکلّا
جتھے اپنا آپ نہ میوے ہور کھڑے تاں جھلاّ
668
جاں ایہ اپنا آپ بندے نوں پڑ دا ہے دلبردا
مال ملک تے عزت دولت سنگ کھڑیاں کدتردا

لفظالی:
سوزوں = سوز پاروں ۔چالی = چلن دا طریقہ۔ کیش۔ مذہب ۔چھپدا = گواچ جاندا اے ۔ چھُپدے= غائب ہو جاندے نیں،دل چھپنا = نبض دا جواب دے جانا ۔سرگردانی = حقیقت دی بھال وچ ایدھر اودھر سرمارنا ۔گِلیوں شُکر = خالق دا گلہ کردے کردے اوہدا شکر ادا کرن لگے گا۔ ایسے طرحاں رب دے انکار وچوں ای رب منن دی راہ نکل آوندی اے ۔بائی = کہی۔ آکھی ۔فرموشی = بھُلن دی عادت۔ فراموشی ۔کانگ = وڈا ہڑھ ۔ دریا(ف)=سمندر ۔بریتا = دریا دا چھڈیا ہویا راہ جتھے ریت ای ریت ہوندی اے ۔کسر = مرض۔ روگ ۔سکھالا =خوش حالت وچ 'سُکھ وچ ۔واندے پین کشالا = وکھرے لُگے ہوکے ظاہر ہوون وچ ای دکھ تکلیف تے قضیئے جھگڑے نیں ۔آنے = لیاوے۔ کڈھے ۔میوے = سماوے ۔کدتردا = کدوں پار لنگھے گا ۔غیر نہ مٹدا = دوجا نہیں سماندا۔ دوجا سالک دے نال نہیں رہ سکدا