ورقہ 38

669
لَنْ تَنَالُواالْبِرََّ بھائی سٹ تمامی چیزاں
فرد ہووے تاں مرد کہاوے ملدا نال عزیزاں
670
خاطر جمع ہوئے جس ویلے خودی ونجے بیخودیوں
پاک ہووے تاں باہر آوے ہر ہر نیکی بدیوں
671
جاں ایہ نیکی بدی نہ رہندی اس دم عاشق ہوندا
ہو فنا عشق دا اوّل یاری کرن کھلوندا
672
جیوں ایہ حال احوال فقر دا غائب ساڈی نظروں
تیویں شرح زبانوں اوہلے نالے صفتوں خبروں
673
مر کے جیون دی گل بھائی دسے کون زبانوں
بَعْثَ بَعْدَ الْمَوْت سخن دے معنی دور بیانوں
674
بعد فنایوں باقی ہونا کے جاناں اس باتوں
نویں کتاب بنے جے لِکھاں باتاں نفی اثباتوں
675
مر کے جیون دی گل چنگی سو جانے جو کردا
جس دے سر پر ورتی ہووے کم نہیں ہر ہر دا
676
میں کے جاناں حال فقر دے مدعی نفسانی
سنی سُنائی لِکھ وکھائی پائی نہیں نشانی
677
اپنی موت حیاتی اندر جب لگ تیرا ڈیرا
اس منزل وچ کد محمد پَیر پوَے گا تیرا
678
اپنا آپ محمدبخشا تیرا مصر شہر ہے
مشکل پندھ سجن دی لوڑے رستہ برّ بحر ہے
679
جاں ایہ مصر پیارا تینوں کوڑا زہر ہوئے گا
تاہیئں وَل سفر ول جاسیں پینڈا لہر ہوئیگا
680
دھیاّں پُتر بھیناں بھائی وِچھڑ سنگوں ساتھوں
بیڑی روہڑ اسباباں والی عشق ندی دی ٹھاٹھوں
681
رستہ دور نہ اوڑک جس دا گھنے قضیے دِسدے
پر جو نال یقینے ٹُردے ونج سجن سنگ وِسدے
682
توڑے کجھ نہ معلم اس دا تھاں ٹکانا پاسا
چھڈ دنیا پو لہر فقر دی رکھ ِملن دی آسا
683
یار ملے بن مرسو ناہیں سیس تساں جے ہُولے
اوہ تیرا توں اس دا ہوسیں وِتھ نہ رہسی موُلے
684
محبوباں دی بے پرواہی سن کے ہُٹ نہ رہوکھاں
ہمت آس قراری کر کے ونج اوسے در ڈھہوکھاں
685
صبر توکّل عاصم والے ہمّت سیف ملوکے
کریں قبول نہ ہُٹیں توڑے سبھ کوئی ٹھاکے کُوکے
686
اپنا آپ چھڈیں اُس کارن ساجن تاں گھٹ آون
سبھ جگ اُتےّ شاہی تیری پریاں تخت اُڈاون
687
ڈھونڈن والے مڑن نہ خالی خود حضرت فرماوے
ویکھاں سیف ملوکے ولوں جو لوڑے سو پاوے

لفظالی:
لن تَنَالُو البِرَّ= ق م ال عمران۔ ٩٢ جد تائیں اوہ کجھ خرچ نہ کرو گے جنہوں تسی پیارا جاندے او نیکی تائیں ہرگز نہ پہنچو گے ۔خودی ونج = تکبر مان مک جاوے گا ۔بے خودیوں = اپنے آپ دی نفی کرن نال ۔صفتوں خبروں = سالک دے حال تے چج چالے ۔ دی تشریح زبانوں نہیں ہوسکدی ۔ بَعثَ بعدالموت = ٹ ک ایماں مفصل البقرہ ۔ ٢٨، نفی اثباتوں = کلمہ طیبہ دے معنیاں تے غور کرو۔غیر اللہ دی نفی کرن دا حکم اے تے نرے اللہ نوں منن دا حکم اے ۔مدعی = دعوی کرن والا ۔نفسانی = نفس پرست ۔لوڑے = تلاش وچ ۔تاہیں = اوسے صورت وچ ای ۔اوڑک = انتہاء ۔ آخری سرا ۔ ول=چنگی طرحاں ۔ونج سجن سنگ وِسدے = جاکے سجن دا اعتماد حاصل کرلیندے نیں ۔سیس ہُولنا = سرنوں قربانی لئی تیار کرنا۔ اپنی جان نوں خطرے وچ پاونا رکاوٹ نوں ٹکر مارکے دھس مارکے اگانہہ لنگھ جانا ۔حضرت فرماوے = حدیث شریف وچ آیا اے ۔فرد= اِکلا،