ورقہ 6

حضور سرور کائنات دی نعت
90
واہ کریم اُمت دا والی مہر شفاعت کردا
جبرائیل جہیے جس چاکر نبیاں دا سر کردہ
91
اوہ محبوب حبیب ربانا حامی روز حشر دا
آپ یتیم یتیماں تائیں ہتھ سرے پر دھردا
92
جے لکھ واریں عطر گلابوں دھویئے ِنت زباناں
نام اُنہاں دے لائق ناہیں کے قلمے دا کانا
93
نعت انہاں دی لائق پاکی کد اساں ناداناں
میں پلیت ندی وچ وڑیا پاک کرے تن جاناں
94
نال اشارت ٹکڑے کیتا جس نے چن اسمانی
سک روڑاں تھیں جس پڑھایا کلمہ ذکر زبانی
95
معجزیوں اس بہت ودھائی تھوڑی سی مہمانی
لشکر تساّ سبھ رجایا ہِکسے کاسے پانی
96
صدر نشین دیوان حشر دا افسر وچ اماماں
کل نبی محتاج اِنہاندے نفراں وانگ غلاماں
97
دنیا تے جد ظاہر ہویا گھُریا دین دمامہ
کوہ قافاں نے سیس نِمایا کوٹ کفار تماماں
98
تخت چبارے شاہی کنبے ڈھٹھے کفر منارے
چھیک دتے قرآن اوہدے نے اگلے دفتر سارے
99
سبھو نور اوسے دے نوروں اُس دا نور حضوروں
اس نوں تخت عرش دا ملیا موسیٰ نوں کوہ طوروں
100
لَو لَا کَ لَمَا خَلَقتُ الکَونَ آیا شان اِنہاں دے
جِنّ انسان غلام فرشتے دوئے جہان اِنہاں دے
101
نور محمد روشن آہا آدم جدوں نہ ہویا
اوّل آخر دوئے پاسے اوہو مل کھلویا
102
پاک جمال اوہدے نوں سِکدے روح نبیّاں سندے
حوراں ملک انہاندی خاطر خدمت کارن بندے
103
ولی جنہاں دی امتّ سندے نبیاں نال برابر
امت اس دی بنیا لوڑن مُرسل ہور اکابر
104
حسن بزار اوہدے سے یوسف بردے ہووکاندے
ذوالقرنین سلیماں جیہے خدمت گار کہاندے
105
عیسیٰ خاک ایہناں دے در دی گھِن تیمم کردا
تاہئیں دست مبارک اس دا شافی ہر ضرر دا
106
خال غلامی اس دی والا لایا پاک خلیلے
جانی نوں قربانی کیتا مہتر اسما عیلے
107
موسیٰ خضر نقیب انہاندے اگے بھجن راہی
اوہ سلطان محمد والی مرسل ہور سپاہی

لفظالی:
سرتے ہتھ دھرنا = سرپرستی تے پالنا کرنا ۔سک روڑ = کنکر۔ سنگریزے ۔مہمانی = مہماناں لئی پکا کھانا ۔دین دمامہ گھُریا = دین دا نقارہ کھڑکیا ۔چھیک دینا = موری کرکے ردی کردینا ۔اگلے دفتر = پہلیاں آیاں الہامی کتاباں ۔لَولاٰکَ لَمَا.(حدیث قدسی) اے رسول جے میں تینوں پیدا نہ کردا تے دنیا ای پیدا نہ کردا ۔سِکدے = ترسدے۔ ملن دی شدید خواہش رکھدے ۔سندے = دے ۔ولی جہناں دی = ٹ ک العلماء امتی کا نبیاء بنی اسرائیل (حدیث نبوی) ۔مرسل = رسول ،نِمایا = جھکایا ۔مہتر اسماعیلے = حضرت اسمعیل ۔ذوالقرنین = ٹ ک ۔عیسی خاک = مسجد اقصی دے اک دروازے داناں باب محمد اے حصرت عیسیٰ ایسے دروازے وچوں رڑھ کے لنگھدے ہوون گے دروازے دی مٹی اوہناں دے ہتھاں نال لگن داا امکان اے۔
صدر نشیں = پردھانگی تے بیٹھا ہویا،افسر= تاج ، بندے= غلام