ورقہ 40

699
راکھش آدم کھاون والے تیغ اوہدی تھیں ڈر دے
کوہ قافاں دیاں غاراں اندر جا گزر اناں کر دے
700
جھنڈے چھتر نشان ہزاراں لکھ کوئی سر کردے
سر کردے مہمّاں تائیں آ قدمیں سر دھردے
701
شاہ زمیں دے سارے ڈر دے ثانی کوئی نہ آہا
اگے آ گذارن نذراں جت ول پاوے راھا
702
ہک اللہ دا خوف ہمیشہ دہشت ہور نہ کائی
دشمن سبھ تہ تیغ کیتے سن عالم وچ دُہائی
703
عیش خوشی جو دنیا والی سبھو سی ہتھ آئی
سبھ مراداں چاہاں پایاں کردا شکر خدائی
704
ہِک مراد رہی دل اندر گھر اولاد نہ ہوئی
جاں جاں اوہ نہ حاصل ہووے ہور نہ سجُھدی کوئی
705
عاصم اس اندیشے اندر رات دینہاں دلگیری
ربا ایہ میری سلطانی دولت فوج گھنیری
706
بن فرزند میرے کس کاری ایہ سارے اُسرگے
جاں اس فکر اندر جیو جاوے اگ اندر وچ لگے
707
جاں جاں عمر جوانی آہی لنگھی آسا آسا
مجلس لاوے موجاں مانے غم نہ آہا ماسا
708
باہٹھ ورھے جد عمر وہانی چلی بہار جوانی
شاخ ہری رنگ پیلا ہویا آئی رت خزانی
709
سرو ازاد لگا خم کھاون چنبے کلیاں کِریاں
لالے تھیں پھل کیسر ہوئے ہور بہاراں پھریاں
710
سنبل فصل پیا آ گھاٹے نکلن لگیاں تاراں
نیندر مست دتی چھڈ نرگس بیٹھا وانگ بیداراں
711
کس توری آ پُہتی اوتھے کستوری سنگ بوُری
وچ وچ آن وکھالی دتی کافوری رنگ نوری
712
اوہ سبزہ خط چھاپے والا کِرن لگا ای چنبا
لگا ویکھ چنارے پنجے بید والا تھرکنبا
713
سرد ہویا دل خوشیاں ولوں دنیا جھوٹھ ککارا
جے سے برس کیتی میں شاہی اوڑک چلّن ہارا
714
دولت مال خزانے لشکر تخت ولایت شاہی
بعد میرے کوئی ہور لئے گا میں ہاں اج کل راہی
715
دل میرے نوں چنگا لگدا تاہئیں ایہ پسارا
جے اج اکھیں اگے ہوندا ہِک فرزند پیارا
716
میں کے عجب بے عقلی کردا جھلاں مفت ککارے
عاصم شاہ محمدبخشا ایہ اندیشے دھارے
717
ٹراں مہمے سختی جھاگاں سودھ کراں شکرانہ
سے اندیشے رات دینہاں وچ عمر اینویں گزراناں

لفظالی:
راکھش = راکھشس۔ جنگلی شیطان ۔سرکردے = سردار۔ امیر پنچ ۔راہا = کسے علاقے وچ داخلہ ۔مراد = خواہش ۔ سُجھدی = نظر آوندی ،دلگیری =غم افسوس نال دل پھڑ بہنا ۔اسرگے = اساری۔ تعمیراتی کم۔ محل ماڑیاں ۔آسا آسا = آساں امیداں وچ ۔خم کھاون لگا = لک کبا ہوون لگا ۔چنبے کلیاں کِریاں = دندڈگن لگے ۔لالے تھیں کیسر = گلھاں دی سرخی مکی تے رنگ زرد ہوگیا ۔سنبل فصل = وال جھڑن لگے ۔نیندر ۔۔۔۔۔۔ = اکھاں وچو ں نیندر اڈگئی ۔کس توری = کہنے روانہ کیتی ۔کستوری سنگ بوری = کالے والاں نال بوری مجھ رنگے وال کس آن رلائے نیں ۔وچ وچ = کدھرے کدھرے ۔کافوری رنگ نوری = چٹے دھولیاں نے وکھالی آن دتی اے ۔اوہ سبزہ خط۔۔۔۔۔۔ = کدی تے نوجوانی دی حالت وچ مس پھٹن والے وال سوہنے لگدے سن پرہن تے چنبے ورگے دندڈِگن لگ پئے نےں ۔ککارا = کاکورولا ۔اوڑک = آخرکار ۔جیو= جی۔ رُوح ۔ دِل