ورقہ 41

718
اوتر نام پیاں کے کرنا مال متاع گھنیری
گوشے بیٹھاں ہو چُپیتا رکھ اللہ دی ڈھیری
719
جے فرزند ہوندا ہک لائق تاں ہوندی خوشحالی
میرے پِچھے ہوسی بیٹا تخت ملک دا والی
720
ایہ اندیشے کر کے عاصم جا گوشے وچ وڑیا
بیٹھ محل اکلے اندر بوہے سنگل جڑیا
721
آون جاون لوکاں والا سارا بند کرایا
نہ کجھ کھاوے نہ کجھ پیوے نیند آرام گوایا
722
نہ اوہ کول کسے نوں سدے گل کلام نہ کردا
گریہ زاری کم ہمیشہ گھڑی تمام نہ کردا
723
چالیھ روز ہوئے اس اینویں مولیٰ اگے روندا
عُسروں یُسر محمدبخشا اوڑک ہکدن ہوندا
724
میر وزیر امراء وڈیرے فکر کرن رل سارے
کیہی مہم ایہ ڈاہڈی آئی شاہنشاہ ہمارے
725
کر مصلاحت کرو تدارک کجھ تدبیر بناؤ
دو وزیر پیارے شاہ دے بوہا جا کھولاؤ
726
ہتھ بنھ عرض کرو شاہ اگے پُچھو حال حقیقت
کس سببوں گوشے بیٹھا اس ول کے مصیبت
727
مت سلطان اساڈا یارو حال حقیقت دسےّ
کیجے کجھ تدارک چارہ مت پھر ہسےّ رسےّ
728
چہل وزیر عاصم دے آہے ہِک تھیں ہِک چنگیرے
پر دو اوہناں وچوں آہے محرم خاص اگیرے
729
صالح ابن حمید ہکی دا راوی نام بتاندا
مادر پوش ہامان دا بیٹا دوجا آکھ سناندا
730
ایہ وزیر دوئے اُٹھ وگے کھول وڑے دروازہ
شاہ پیا بے حال ڈِٹھوّ نیں لِسّا بے اندازہ
731
مُردے ونی رنگ جُثےّ تے زرد ہویا مُنہ پیلا
اکھیں نہراں پانی دیون سرو ہویا پِھر تیلا
732
نہ اُس طاقت گل کرن دی نہ سی ہوش ٹکانے
چا اٹھال بہال کراون گلاں زور دھگانے
733
اوّل کر تعظیم سلاماں کر دے پھیر ثنائیں
ثانی تیرا ناہیں شاہا مشرق مغرب تائیں
734
ادنیٰ حصہّ ملک تیرے دا شاہ سلیماں پایا
حکم اقبال تساڈا حضرت دم دم ہوئے سوایا
735
کئیں شاہزادے تختاں والے چاکر تیرے اگے

عالم فاضل کرن دُعائیں تتی واء نہ لگے
736
اسیں وزیر صلاحاں جوگے تیرے ہتھیں پالے
فوجاں کٹک مہماں کارن دشمن مارن والے

لفظالی:
اوتر= ٹ ک اَبتر (ع) دُم کٹا بے اولاد۔ ڈھیری= اُمید آس۔ بوہے سنگل جڑیا= دروازے دے اندر لا کُنڈا مار لیا۔ تمام نہ کردا= پوری نہ کردا' نہیں گذاردا۔ عسروں یُسر= ٹ ک ق م 94/5-6۔ مصلاحت= صلاح مشورہ ۔ چہل = چالیھ ۔لِساّ =کمزور۔ جس تے کوئی چر بیلا موٹاپا نہ ہووے۔ مردے ونی=مردے ورگا ، زرد پیلابے رونق رنگ۔ دھگانے= زبردستی ' دھکے زوری۔ دمدم= دم بدم' ہر ساہ نال۔ سوایا ہوئے= ترقی کرے ' اک توں سوا ہو جائے۔ تتیّ وا= معمولی جیہی تکلیف۔ کٹک= مارو لشکر جیہڑا انساناں توں علاوہ ڈھور ڈنگراں دی وی وڈھ ٹک کردا جائے۔،مارن والے= شکست دین والے، مت= ممکن اے ۔ شایئد، اوڑک= آخر کار، خوشحالی= خوشی ۔ چنگا مُوڈ،