ورقہ 43

756
کر کے سمجھ نجومی کہندے چنگی فال وزیرو
دیہو مبارک عاصم شاہ نوں تکڑے ہوؤ امیرو
757
شاہ بدخشاں دے دی بیٹی جے عاصم نوں لبھے
اوس وچوں رب بیٹا دیسی ہوسن صفتاں سبھے
758
عادل عالم فاضل ہوسی ملکاں وچ اُجاگر
حلم حیاء ہدایت والا سوہنا سخی بہادر
759
لمّی عمر حیاتی والا رہسی نال اقبالاں
اینویں آیا نظر وزیرو سانوں اندر فالاں
760
جاں ایہ خبر گئی سلطانے خوشی ہوئی اس گل دی
گوشے تھیں اُٹھ آیا بیٹھا تختے اُتے جلدی
761
شکر ہزار گزار وزیراں کیتی آن سلامی
لکھ کروڑ دِتے سر صدقے لین انعام انعامی
762
لا دربار بیٹھا شاہ عاصم وچ امیر وزیراں
عالم رملی رخصت کیتے دے دھرم ارتھ جگیراں
763
صالح ابن حمید وزیرے نال لائے سرکردے
چالیھ ہور وزیر سیانے صاحب عقل ہنر دے
764
کئیں حکیم افلاطوں جیہے کار روا جگ دیدے
سبھناں اُتّے افسر کیتا صالح ابن حمیدے
765
ڈالی تحفے بہت عجائب کئیں ہزار سوغاتاں
صالح دے حوالے کیتیاں گھلیا کارن باتاں
766
کہیوس جیکر آیوں فتحیا ہور بہوں تدھ بخشاں
صالح نال اقبال روانہ ہویا طرف بدخشاں
767
شاہ بدخشاں والے اگے تحفے جا گزرانے
نالے صالح گلاں کر کے کھول دسے پروانے
768
جاں پھر شاہ بدخشاں والے سمجھی گل تمامی
شکر گذار وکیلاں تائیں خلعت دے گرامی
769
بہتی عزّت خدمت کیتی دتے محلیں ڈیرے
رات دینہاں مہمانی دیندا کرے اوہناں ول پھیرے
770
ست دہاڑے خاطر کر کے رکھے زور دھگانے
رنگاں رنگاں دے نت دیندا بادشہانے کھانے
771
اٹھویں روز تیاری کیتی بیٹی ڈولی پائی
جو کجھ داج شہانہ دتا کون حساب سنائی
772
گھوڑے خچر اُٹھ ہزاراں موتی لعل جواہر
لکھاں تھان دتے زربفتوں دولت انتوں باہر
773
گولیاں گولے سوہنے سندر زیور لاء سنگارے
ڈولی دا سر صدقہ کر کے دتے باپ بیچارے
774
جِنہاں نال پیار بیٹی دا سنگ سہیلیاں دایاں
لایاں نال رکھو خوش اسنوں وانگن بھیناں مایاں

لفظالی:
اُجاگر= روشن' مشہور۔ اقبالاں= خوش بختی۔ تختے= تخت۔ شکرگزار= شکر ادا کرکے۔ انعامی= انعام دے حقدار۔ رمل= ہندسیاں تے خطاں دی مدد نال قسمت داحال دسن بارے علم ۔دھرم ارتھ جاگیر= لوک بھلائی یا دینی مقصداں لئی ورتیجن لئی کوئی خاص وقف جاگیر جہدا انتظام کسے مہاتما یا روحانی پیشوادے سپرد ہوندا اے۔ کارروا= معاملہ حل کرن والے ۔ جگ دیدے= دنیا تے پھرے ٹُرے' گھاگ ' تجربہ کار۔ فتحیا= کامیاب۔ گزرانے= پیش کیتے۔ گرامی= قدر قیمت دے قابل۔ زور دھگانے= زبردستی ۔ دھکو دھکی= اصرار کر کے۔ گولیاں = کنیزاں۔ گولے= غلام۔ دایاں= بچے پالن والیاں بڈھیاں نوکرانیاں ۔ نال لایاں = مقرر ۔ ملازم کر دتیاں۔اقبال= بلند بختی دیاں ساریاں نشانیاں، انتوں باہر= بے اوڑکی،