ورقہ 7

108
دہ سے سدّ جنہاں نوں ہویا نیڑے آء پیارا
نعت انہاں دی کے کجھ لکھے شاعر اوگنہارا

معراج شریف دا ذکر

109
آئی رات مبارک والی بھاگ اساڈے جاگے
سجناں تے خوش مُشکاں ڈُہلیاں دشمن سر ُسہاگے
110
اسماناں پر تارے روشن شمع چراغ یگانے
سِکدیاں یاراں نوں آ پُہتے سِکاں دے پروانے
111
وحی وکیل لیایا سدّا نالے گھوڑا جوڑا
آملئے ہِک جوڑ محمد تینوں قُرب نہ تھوڑا
112
ہر دم سِک تساڈی سانوں آئی رات ملن دی
سد گھلیوں وڈیائی دے کے عزت ودھی سجن دی
113
لوح قلم اسماناں زمیاں دوزخ جنت تائیں
کرسی عرش معلی ویکھیں سیر کریں سبھ جائیں
114
عزت قرب تساڈا ویکھن حوراں ملک پیارے
نالے روح نبیاں سندے ہون سلامی سارے
115
دوزخ جنت وچ اسماناں جو خلقُ اللہ وسدی
پاک جمال تساڈے کارن ہر دی جان ترسدی
116
ویکھ جمال حبیب میرے دا صدقے صدقے جاون
شرف سعادت پاون سارے شکر بجا لیاون
117
ہویا سوار براقے اُتے اوہ سلطان عرب دا
چائی واگ محبت والی ٹریا راہ طلب دا
118
لے لے نذراں ملدے اگوں روح تمام نبیاں
خدمت اندر حاضر ہوئے بدھے لک ولیاّں
119
سے سنگار کیتے سبھ حوراں منگل گاون کھلیاں
اج جنجاں دا لاڑا آیا مل مل رکھو گلیاں
120
اَسریٰ دا سرگشت سرے تے افسر سی لولا کی
طٰہٰ تے یٰسۤ پھلاں دا سہرا شرم تے پاکی
121
سوہنی جھنڈ معنبر سر تے چمکے نور دُخانوں
سرمہ سی مازَاغَ اکھیں وچ گل تعویذ قرآنوں
122
نعت درود صلوٰۃ سلاموں چھٹیاں جھولن قطاراں
صلی اللہ علیہ وسلم کرن نقیب پکاراں
123
چھوڑ اسماناں زمیاں تائیں سرور گیا اگیرے
جتھے وحی نہیں ونجھ سکدا ہٹ بیٹھا کر ڈیرے
124
سرور نے فرمایا اس نوں جے توں ساتھی میرا
چل اگیرے نال اساڈے کیوں بیٹھوں کر ڈیرا

لفظالی:
دہ سے سد = ہزارواراں بلاوا ٹ ک معارج النبوۃ فارسی ۔منگل = جی آیا ںنوں تے مبار ک باد دے گیت ۔سُہاگا = سواہ کھیہہ ۔سِکدیاں = چاہت نال اڈیکدیاں ۔مل مل رکھو = صاف ستھریاں کرکے رکھو ۔یگانہ = بے نظیر جہدے نال دا کوئی نہ ہووے ۔اسریٰ = ٹ ک ق م بنی اسرائیل،سرگشت=چھتر ،پروانہ = اجازت نامہ۔ خط ۔وڈیائی = عظمت۔ فضیلت ۔افسر = تاج ۔لولاکی = حدیث لولاک لما وچ بیانیا رتبہ ۔سِک = ملن دی زبردست چروکنی خواہش ۔جمال = نظارہ جلوہ ۔ٹریا = طے کیتا ۔بدھے لک = کمر بستہ ہوکے۔ غلاماں دی وردی پاکے ۔طہٰ تے یٰس = قرآن مجید دی سورت تے سورۃ وچ اللہ تعالیٰ نے گُجھے لفظاں وچ رسول مقبول دی تعریف کیتی اے۔ تفسیراں وی اصل کنہ تائیں نہیں اپڑ سکیاں ۔دخانوں = دھوئیں وچوں ۔مازاغ = ٹ ک ق م سورۃ النجم ۔ ، زِمیاں = زمین ورگے سیارے، ہک = سینہ ، براق= حضور نوں معراج شریف تے لے جاون والا سوہنا گھوڑا،