ورقہ 44

775
لشکر سنے وزیراں تائیں بخشے جوڑے گھوڑے
دے ہتھیار بھلیرے ٹورے نالے کلغی توڑے
776
طرف مصر دے ہوئے روانے جاں پھر نیڑے آئے
دے خوشخبر وزیرے قاصد عاصم طرف وگائے
777
عاصم شاہ سلطان اُچیرے تنبو باہر لوائے
شادی دے اسباب تمامی اوتھے آن سُہائے
778
تنبو خیمے جڑت جڑاؤ موتی تے زرکاری
سورج نال رلاون رسماں لگے پُھل کناری
779
پلےّ سیون سبھ زردوزی تِلےّ جائی دھاگے
سیج وچھی وچ عاصم شاہ دی کوہیں جھلمل لاگے
780
آء دربار شہانہ لگا خلقت کٹھی ہوئی
زمیں زمن وچ آدم دِسدا انت نہ آوے کوئی
781
دیباتے زربفت حریروں اطلس خیمے لائے
شالاں سُچیاں ہور غلیچے فرش فروش وچھائے
782
اگے چھتر سنہری لائے چمک دسن اسماناں
کیتی چھاں جہانے اُتے اُچیاں سائباناں
783
بادشاہی زربفت وچھائی پھلاں سیج وچھائی
کرسی ہور جڑاؤ سوہنی ہر سر کردے پائی
784
چارے طاق محل سُہایا انبر تے سرطاقاں
ہر طاقے وچ سوہنے کھیڈن الفت نال اتفاقاں
785
سائے باناں ہیٹھ ہر جائے بیٹھی خلق چوپھیرے
حوراں ویکھ ہوون دل گھائل کنجریاں دے پھیرے
786
عاصم شاہ تک مجلس رسی جشن نو روز بنائے
خویش قبیلے محرم خاصے میر وزیر سدائے
787
عجب عجائب چیز نعامت بہت بَھگائے کھانے
دُھکھن عُود گئی بوء کوہیں عطر عنبیر ڈوہلائے
788
کھانے کھا ہوئے آسو دے مشکوں خوشی دماغاں
پی شراب ہوون رنگ تازے جیونکر لاٹ چراغاں
789
شاہ بد خشاں دے دی بیٹی عاصم شاہ ویاہی
آس لگی مت بیٹا دیسی کرسی کرم الٰہی
790
بیگم نال کریندا خوشیاں چین ہویا پھر تازہ
مارے طاق فکر دے کُھلا خوشےاں دا دروازہ
791
بیگم نال سہیلی جیہڑی شاہ بد خشاں ٹوری
صالح ابن حمیدے ہکدن ڈٹھی سی اوہ گوری
792
ویکھن سات اوہدا دل وِکیا صالح رب دھیاوے
بیگم دی سہیلی کیویں ایہ مینوں ہتھ آوے
793
عاصم شاہ دے اوس وزیرے دتی عشق ظہیری
صبر قرار آرام نہ رہیوس رات دہاں دلگیری

لفظالی:
جوڑے = کپڑیاں دے جوڑے جویں سلوار قمیص' خلعت دے کپڑے۔ کلغی= متھے تے آئی پگ دی چوٹی اُتے ٹِکیا ہیرے جڑیا گہنا۔ وگائے= دوڑائے۔ بھلیرے = چنگے توں چنگے۔ رسماں = رشماں ' کرناں۔ کناری= بارڈر تے لگی کنگری۔ فروش= فرش دی جمع ' غالیچے' قالین۔ چار طاق محل= چارے پاسے محرابی دروازیاں وا لا محل ۔ رنگ= چہرے دی چمک ۔ مت= شاید۔ ظہیری= لک پیڑ پاروں سریر وچ پران دی ات کمزوری۔ زمن= زمانہ جگ ۔ بُھگائے=چکھائے' سواد چکھایا۔ ڈوہلائے= ڈوہلے گئے۔ مُشکوں= کستوری دی خوشبو توں ۔ ویکھن سات= ویکھدیاں ای۔ دھیاونا=دُعا کرنا۔رسی=رنگ رس تے آئی ۔ بھخی، جشنِ نوروز= ایران وچ سال دے پہلے دن دا رونق میلہ، عنبیر = عنبر، عُود = اگر ۔ کالی لکڑی جنہوں ساڑیاں خوشبو آوندی اے،