ورقہ 45

794
جیوں پنجر وچ پنکھی ہوندا تیویں وقت لنگھائی
بُھل گیاں تدبیراں ہوشاں دانش عقل دانائی
795
ہوئی خبر امیراں تائیں عشقے دے اقبالوں
عاصم شاہ نوں واقف کیتا صالح دے احوالوں
796
چا بخشی سلطانے اس نوں اوہ معشوق پیاری
عقد کیتا خوش وسن لگے بھُلی خفگی ساری

شہزادے سیف الملوک دا جنم

797
شاہ وزیر دوہاں تے ہویا کرم سچاواں ذاتی
بیگم اتے سہیلی اس دی حمل ہویا ہک راتی
798
نوں مہینے نوں دہاڑے نوں ساعت تھیں پِچھے
دوہاں نوں رب بیٹے دتے آئے نی دن بِھچھےّ
799
شاہزادہ سی لعل چمکدا سورج شکل پیارا
نگ موتی صالح دا بیٹا چن جیہا چمکارا
800
دائی ویکھ ہوئی سودائی ہر دے رُوپ اتارے
چہرے تے چمکارے مارن اقبالاں دے تارے
801
سورج ویکھ شہزادے صورت چھپ بدلے دن کٹدا
ویکھ وزیرے دے فرزندے چودھیں دا چن گھٹدا
802
کھان بدخشاں دوہاں آہی جمےّ لعل بد خشاں
حوراں نوں حیرانی آئی ویکھ ایہناں دیاں نقشاں
803
موتی ویکھ سمندر اندر بے آبی وچ مردے
مانک ہیرے ہار صفائیوں سر دھڑ صدقے کر دے
804
شاہ وزیر دوہاں دے باغیں عجب شگوفے جمےّ
صفتاں وچ نہ رہو محمد اگے قصے لمےّ
805
شاہ وزیر کیتے شکرانے زر دتی فقراواں
کئی معاش جگیراں دتیاں رملی تے علماواں
806
سدا برت ہر رستے اُتّے لایاں ہور چھبیلاں
دے سروپا نوازش کیتی آدی دیاں اصیلاں !
807
انھےّ لُوہلے لوڑ شہر دے دتے گھوڑے جوڑے
کوٹھی اُتے رستوں لایاں آیاں کوئی نہ موڑے
808
زر دتی کنگالاں تائیں درویشاں نوں لنگر
کوئی کنگال نہ رہیا شہریں لے لے ہوئے تونگر
809
شادی دے شدیانے وجے بھیراں لگیاں چوٹاں
مُلکاں اندر شلکاں ہویاں ہر تھانے وچ کوٹاں
810
شہزادے امراء ہزاراں میر وزیر تمامی
سرکردے سبھ جنگی ملکی راجے رائے انعامی

لفظالی:
پنجر= پنجرا۔ اقبالوں= خوش بختی نال اگانہہ ودھن بارے۔ سچاواں= سچ ( حق تعالی) نال متعلق ' حق تے مبنی، ذاتی=اللہ تعالیٰ دی ذات دا ۔ہِر دے رُوپ اتارے= بچے دا حُسن دِل تے نقش کرے۔ بے آبی= چمک نہ ہون پاروں بے عزتی۔ مانک= قیمتی منکا۔ آدی= شروع توں ای امیر کبیر' آددا' خاندانی۔ بھیراں = نقارے۔ شلکاں=بندوقاں' توپاںدی سلامی۔ کوٹ= قلعے ۔ خفگی= گُھٹن ' غم ' غصے دی حالت۔ بھچھے= بھچھیا وچ منگے ہوئے جنہاں دی چروکی سدھر سی، بدلے= بدل وچ۔ کھان = کان ' معدنی خزانہ۔ معاش جگیر= بادشاہ وتوں مِلی ایسی جگیر کہ جگیر دار ساری عمر بیٹھا کھاوے۔ رسدوں= کچا راشن۔ چھبیل = سبیل پانی دا مفت ذریعہ ۔ سروپا = سر توں پیراں تائیں قیمتی خلعت ۔ سدا برت= ہر ویلے جاری رہن والا لنگر،اصیل=خاندانی ۔ چنگے نام نسب والا، کوٹھی = اناج دے گودام