ات واد بھیڑی سیاست: عراق توں مگروں پاکستان تے افغانستان سب توں بھیڑے ملک
وچار ڈیسک
June 29th, 2009
عالمی بینک نے گورننس انڈیکیٹر دو ہزار اٹھ دی رپورٹ وچ ات واد تے بھیڑی سیاست دے حساب نال عراق توں مگروں پاکستان تے افغانستان نوں سب توں بھیڑا ملک آکھیا ہے۔ واشنگٹن وچ جاری ہوون والی عالمی بینک دی رپورٹ وچ دسیا گیا ہے پئی سیاسی مضبوطی مارا ماری تے ات واد دے حساب نال عراق وچ صورتحال سب توں بوہتی خطرناک ہے تے انڈیکٹر وچ عراق نوں صفر درجہ دتا گیا ہے تے پاکستان افغانستان وچ ایہہ صورتحال صرف اک فیصد دی پدھر تے ہے جدوں کہ امریکا وچ ایہہ پدھر چھیاسی فیصد ہے۔
رپورٹ موجب افغانستان وچ کِتے وی قنون دی حکمرانی نظر نہیں آوندی تے انڈکس وچ ایہہ صفر دی پدھر تے ہے جدوں کہ عراق وچ اک فیصد قنون تے عمل ہوندا ہے ایتھے پاکستان دی صورتحال چنگی ہے تے قنون دی حکمرانی اُنی فیصد ہے۔ رپورٹ وچ کہیا گیا ہے پاکستان وچ حکومت دے فیدیاں نوں چھبی فیصد ، ریگولیٹری فریم ورک پینتی فیصد تے بے ایمانی دی روک دے حساب نال پاکستان نوں پنجھی فیصد دی پدھر تے رکھیا گیا ہے۔
رپورٹ وچ دسیا گیا ہے پئی گورننس تے قنون دی حکمرانی دے حساب نال امیر تے غریب ملکاں وچ بڑا پاڑ ہے۔ پر امیر ملکاں وچ سب ٹھیک دا خیال ٹھیک نہیں ہے۔ حالی مالیاتی بحران نے امیر ملکاں وچ گورنرننس تے ریگولیشن دی صورتحال تے سوال چکے نیں۔ ایہہ رپورٹ اُنی سو چھیانوے توں دو ہزار ست وچکار اکٹھے کیتے گئے نیں جیہدے وچ دو سو باراں ملکاں تے خطیاں بارے پینتی کئی وسیلیاں توں ڈیٹا اکٹھا کر کے گورننس انڈیکیٹر بنایا گیا ہے۔
