پنجاب اسمبلی وچ حکومت تے اپوزیشن آگو ہتھو پائی ہو گئے تے اسمبلی ہال وچ بڑا ہنگامہ ہویا۔ وسیلیاں موجب مسلم لیگ قاف دی رکن پنجاب اسمبلی بشریٰ گردیزی ولوں وزیر اعلیٰ پنجاب شہباز شریف دے خلاف بینر چکن تے صوبائی وزیر جیل خانہ جات عبدالغفور دے اوہناں کولوں بینر کھون اوہناں نوں مندا بولن تے پنجاب اسمبلی وچ ہنگامہ شروع ہو گیا۔
چودھری عبدالغفور نے بجٹ صلاحواں دیاں کتاباں اپوزیشن دیاں زنانیاں نوں مار دتیاں جیہدے مگروں پنجاب اسمبلی وچ اپوزیشن تے حکومتی رکن ہتھو پائی ہو گئے۔
مسلم لیگ قاف دیاں زنانیاں نے چودھری عبدالغفور تے حکومتی رکناں نوں بجٹ دیاں کتاباں مار دتیاں۔ واپری دے خلاف اپوزیشن نے ایوان توں واک آؤٹ کیتا۔ جیہدے مگروں یونیفکیشن بلاک دے آگو عطا مانیکا نے وی ایوان توں واک آؤٹ کر دتا۔ ایوان توں نکلدیاں ہوئیاں مسلم لیگ قاف دے رکناں نے بھرواں روس وکھالا کیتا۔
اپوزیشن لیڈر چودھری ظہیر الدین نے گل کردیاں ہوئیاں کہیا حکومتی ورتارے پاروں ایوان وچ نہیں بیٹھیا جاسکدا اوہناں کہیا چودھری عبدالغفور نے اسمبلی دیاں رکن زنانیاں نال بدتمیزی کیتی۔ اوہناں کہیا سی جدوں تیکر اپوزیشن توں معافی نہیں منگی جاندی ایوان وچ نہیں جاواں گے۔ مسلم لیگ قاف نے منگ کیتی ہے پئی چودھری عبدالغفور دی اسمبلی رکنیت مکا دتی جاوے۔
