قبائلی علاقیاں وچ 3 ہزار 3 سو قبائلی ات واد دی نذر ہو گئے:رپورٹ
وچار ڈیسک
July 1st, 2009
فاٹا سیکرٹیریٹ نے قبائلی علاقیاں وچ ات واد تے شدت پسندی نال ہوون والے جانی تے مالی نقصاناں دی رپورٹ جاری کر دتی ہے جیہدے موجب قبائلی علاقیاں وچ سوا دو ارب ڈالر دا نقصان ہویا ہے۔21 صفحیاں دی ایس رپورٹ وچ کہیا گیا ہے ملک دے ہور شہراں نالوں قبائلی علایاں وچ کِتے ودھ جانی تے مالی ہویا ات واد دیاں واپریاں وچ تن ہزار تن سو قبائلی مارے گئے۔
سب توں بوہتے باجوڑ ایجنسی وچ چھ سو قبائلیاں نوں کھاڑکواں نے نشانہ بنایا۔ کرم ایجنسی اتری تے دکھنی وزیرستان ایجنسی وچ پنج پنج سو بے گناہ قبائلی ات واد دا نشانہ بن گئے۔ ات واد دیاں واپریاں وچ تن ہزار توں ودھ قبائلی پھٹڑ وی ہوئے۔ رپورٹ موجب سرکاری تے پرائیویٹ جائیداداں نوں اپڑن والے نقصان دا مڈھلا تخمینہ 103 ملین ڈالر لایا گیا ہے۔
معاشی طور تے قبائلی علاقیاں وچ اک سو اُنی ملین ڈالر دا نقصان ہویا۔ سماجی شعبے نوں ہوون والے نقصان دا گویڑ اک سو نو ملین ڈالر لایا گیا ہے۔ شدت پسندی پاروں قبائلی علاقیاں وچ رکھاں جنگلاں تے زرعی زمیناں نوں ہوون والے نقصان دا گویڑ اک سو اٹھاسی ملین ڈالر لایا گیا ہے۔ انج سیکورٹی تے آئی ڈی پیز تے ہوون والے خرچیاں دا تخمینہ پنج سو بہتر ملین ڈالر ہے۔
رپورٹ موجب قبائلی علاقیاں وچ ہسپتال، سکول ، سڑکاں، گرڈ اسٹیشن تے پانی دیون دے منصوبے وی تباہ کر دتے گئے۔ انج گھراں ، ہٹیاں، کارخانیاں تے زرعی جائیداداں دا وی بڑا نقصان ہویا۔ رپورٹ وچ گل کھولی گئی ہے پئی کھاڑکواں کول نواں اسلحہ ہے جدوں کہ اوہناں دے مقابلے وچ خاصہ داراں کول مزاحمت لئی بھروسے جوگ اسلحہ نہیں انج خاصہ دار تے لیوی اہلکاراں نوں ماہانہ ساڈھے تن ہزار روپئے تنخواہ ملدی ہے جدوں کہ کھاڑکواں نوں دس توں پندراں ہزار روپئے ماہانہ دتے جاندے نیں تے ایہو پاڑ قبائلی علاقیاں وچ بغاوت دا کارن بنی ہے۔ رپورٹ موجب قبائلی علاقیاں دی تعمیر تے ترقی لئی دو ارب ڈالر چاہی دے نیں۔
